web counter
LEXO PA REKLAMA!

SHKARKO APP

App Store
Google Play

Forumi i IDU-së/ Opozita kërkon mbështetje ndërkombëtare në Zagreb

1 Maj 2026, 12:30, Aktualitet CNA
 

Gjatë punimeve të forumit të Bashkimit Ndërkombëtar Demokrat (IDU) në Zagreb, delegacioni i opozitës shqiptare, i kryesuar nga Sali Berisha, ka zhvilluar një sërë takimesh me zyrtarë të lartë, ku në qendër të diskutimeve ishte situata politike në Shqipëri dhe procesi i integrimit europian.

Në bisedën me kryeministrin kroat, Andrej Plenkovi?, u vu theksi te domosdoshmëria që anëtarësimi në Bashkimin Europian të mos shihet thjesht si një lëvizje gjeostrategjike, por si një proces që bazohet rreptësisht mbi meritën dhe përmbushjen e standardeve të shtetit ligjor.

Berisha shprehu shqetësimin për ndikimin e krimit të organizuar në zgjedhje, ndërsa pala kroate rikonfirmoi mbështetjen për integrimin e bazuar në kritere demokratike.

Shqetësime më specifike u paraqitën përpara presidentit të IDU-së, Stephen Harper, ku delegacioni shqiptar e cilësoi gjendjen në vend si një "autokraci elektorale".

Gjatë këtij takimi u denoncua mbrojtja politike ndaj korrupsionit qeveritar, shndërrimi i ekonomisë në një strukturë të varur nga trafiku i drogës dhe persekutimi i figurave opozitare. Harper, nga ana e tij, konfirmoi mbështetjen e Internacionales Demokratike për opozitën shqiptare, duke vlerësuar orientimin e palëkundur pro-NATO të qytetarëve.

Po ashtu një takim u zhvillua me ministrin e Jashtëm të Maqedonisë së Veriut, Timço Mucunski, ku vëmendja u zhvendos te stabiliteti rajonal dhe projektet strategjike.

Palët diskutuan për rëndësinë e respektimit të të drejtave të shqiptarëve në shtetin fqinj si kusht për bashkëjetesë të qëndrueshme, si dhe për nevojën e jetësimit të Korridorit 8, i cili konsiderohet jetik për zhvillimin ekonomik dhe lidhjen e Ballkanit Perëndimor me tregun europian./ CNA





Lajmet e fundit nga