web counter
LEXO PA REKLAMA!

SHKARKO APP

App Store
Google Play

E fundit!

x

Sondazhi/ Dy të tretat e qytetarëve të Bashkimit Evropian mbështesin rikthimin e Britanisë në BE

21 Qershor 2026, 09:25, Kosova & Bota CNA

Sondazhi/ Dy të tretat e qytetarëve të Bashkimit Evropian

Një sondazh i ri i kryer nga Këshilli Evropian për Marrëdhëniet me Jashtë (ECFR) tregon se dy të tretat e qytetarëve të Bashkimit Evropian do të mbështesnin rikthimin e Mbretërisë së Bashkuar në BE. Në të njëjtën kohë, shumica e britanikëve mendojnë se Brexit ka pasur pasoja negative në çështjet që i konsiderojnë më të rëndësishme.

Dhjetë vjet pas referendumit për Brexit-in, sondazhi i zhvilluar në 15 vende evropiane zbuloi se 66% e të anketuarve e konsiderojnë anëtarësimin e Britanisë në Bashkimin Evropian si një ide të mirë, shumë të mirë ose të paktën janë asnjëanës.

Mbështetja ishte më e ulët në Bullgari (56%), Francë (59%) dhe Itali (59%), ndërsa më e lartë në Holandë dhe Danimarkë, ku arriti në 75%, shkruan The Guardian. 

Edhe votuesit e partive të djathta euroskeptike shprehën mbështetje për marrëdhënie më të afërta mes Bashkimit Evropian dhe Britanisë. Shumica e mbështetësve të Konfederatës në Poloni, Alternativës për Gjermaninë (AfD) dhe Tubimit Kombëtar në Francë favorizojnë afrimin e mëtejshëm.

Disa liderë evropianë kanë shprehur publikisht mbështetje për rikthimin e Britanisë në BE. Presidenti francez Emmanuel Macron ka deklaruar se dera është “gjithmonë e hapur”, ndërsa kryeministri spanjoll Pedro Sanchez ka thënë se Spanja do ta mbështeste “absolutisht” një rikthim të tillë. Presidenti finlandez Alexander Stubb ka shkuar edhe më tej, duke thënë se Evropa ka nevojë për zërin e Britanisë dhe se “na mungoni”.

Në Mbretërinë e Bashkuar, sondazhi i realizuar në muajin maj tregoi se votues nga pothuajse të gjitha partitë politike, përfshirë mbështetës të Reform UK, besojnë se Brexit ka pasur ndikim negativ në vend.

Madje, 58% e atyre që votuan për largimin nga Bashkimi Evropian në vitin 2016 mendojnë se Brexit e ka përkeqësuar situatën e emigracionit të paligjshëm.

Kur u pyetën për përfitimet kryesore të Brexit-it, përgjigjja më e zakonshme ishte “nuk e di”, e ndjekur nga “asnjë nga alternativat e mësipërme”, duke sugjeruar se shumica e britanikëve nuk shohin përfitime të qarta nga largimi nga BE-ja.

Sondazhi tregoi gjithashtu një ndryshim të madh në qëndrimin ndaj lëvizjes së lirë të qytetarëve. Rreth 63% e të anketuarve, përfshirë 57% të votuesve pro-Brexit, thanë se do ta pranonin lëvizjen e lirë nëse kjo do të sillte marrëdhënie më të ngushta tregtare me Bashkimin Evropian.

Edhe mes atyre që e konsiderojnë emigracionin si shqetësimin kryesor, 44% janë të gatshëm të pranojnë lëvizjen e lirë si pjesë e një marrëveshjeje ekonomike më të favorshme me BE-në.

Në fushën e sigurisë, 58% e britanikëve preferojnë bashkëpunim më të afërt me Evropën, ndërsa vetëm 19% e konsiderojnë Shtetet e Bashkuara partnerin kryesor strategjik. Mbi 60% mbështesin një politikë “Bli Evropiane” për blerjet ushtarake dhe 63% duan që Britania të marrë pjesë në zhvillimin e një force parandaluese bërthamore evropiane.

Sipas autorit të raportit, Mark Leonard, rezultatet tregojnë se publiku britanik ka ndryshuar ndjeshëm që nga viti 2016 dhe se tashmë ekziston një mbështetje e gjerë për një afrim shumë më të madh mes Mbretërisë së Bashkuar dhe Bashkimit Evropian. /CNA





Lajmet e fundit nga