E fundit!

11:06 Aktualitet

“Më kanë marrë 63 hektarë tokë në Divjakë”/ Berisha i përgjigjet protestueses: Shpifëse e paguar

Kreu i PD-së, Sali Berisha, i përgjigjet një protestueseje...

Australia konfirmon rastin e parë të gripit të shpendëve H5N1/ Virusi i pranishëm në çdo kontinent

20 Qershor 2026, 08:42, Kosova & Bota CNA

Australia konfirmon rastin e parë të gripit të shpendëve

Australia ka konfirmuar për herë të parë praninë e llojit H5N1 të gripit të shpendëve në territorin e saj, duke shënuar kështu kontinentin e fundit ku ishte ende i pazbuluar ky variant shumë ngjitës i virusit.

Ministrja australiane e Bujqësisë, Julie Collins, bëri të ditur se virusi u identifikua te një zog deti shtegtar, një skua kafe, në një zonë të largët të Australisë Perëndimore. Sipas mediave lokale, shpendi u gjet në një plazh të Parkut Kombëtar Cape le Grand, pranë qytetit të Esperance.

Me këtë konfirmim, Australia bëhet kontinenti i fundit ku është regjistruar varianti H5N1, duke e bërë virusin të pranishëm tashmë në të gjitha kontinentet e botës.

“Ne të gjithë e dinim se nuk mund të mbeteshim përgjithmonë pa gripin e shpendëve”, deklaroi Collins gjatë një konference për shtyp. Ajo njoftoi gjithashtu se autoritetet po hetojnë një rast të dytë të dyshuar te një petrel jugor i gjetur i rraskapitur në një plazh në Esperance, por theksoi se aktualisht nuk ka shenja të vdekshmërisë masive të kafshëve.

Autoritetet australiane kanë nisur monitorimin e situatës, ndërsa Fiona Fraser deklaroi se brenda pak ditësh pritet të përcaktohet nëse virusi është përhapur edhe në popullata të tjera shtazore.

Ndërkohë, kryeveterinerja e vendit, Beth Cookson, tha se autoritetet janë përgatitur prej kohësh për një skenar të tillë dhe se komiteti për sëmundjet emergjente të kafshëve është mbledhur menjëherë pas konfirmimit të rastit.

Lloji H5N1 ishte zbuluar më herët në territoret e largëta australiane të Ishujt Heard dhe McDonald, ku ka shkaktuar pasoja të rënda për jetën e egër. Një studim i fundit vlerëson se mbi 13 mijë foka të vogla kanë ngordhur në Ishullin Heard si pasojë e virusit, ndërsa janë regjistruar gjithashtu humbje të konsiderueshme në popullatat e pinguinëve.

Gripi i shpendëve H5N1 është një virus që prek kryesisht shpendët, por mund të infektojë edhe kafshë të tjera si fokat, dhelprat dhe vidrat. Rastet e infektimit te njerëzit mbeten të rralla dhe zakonisht lidhen me kontakt të drejtpërdrejtë me kafshë të sëmura. Shkencëtarët besojnë se përhapja globale e virusit është favorizuar kryesisht nga migrimi i zogjve të egër./ CNA