web counter
LEXO PA REKLAMA!

SHKARKO APP

App Store
Google Play

E fundit!

x

Erion Veliaj, nën maskën e propagandës

13 Mars 2026, 11:20, Aktualitet CNA

Erion Veliaj, nën maskën e propagandës

Kryebashkiaku i arrestuar i Tiranës, Erion Veliaj, që ndodhet në qelitë e burgut të Durrësit prej më shumë se një viti, nuk ka reshtur gjatë të gjithë kësaj kohe me propagandën e tij të shëmtuar.

Veliaj ka përdorur propagandën për një aspekt ku mbase meriton një çmim, atë të mashtrimit të opinionit publik. Këto veprime kanë ndodhur përmes materialeve të prodhuara e të publikuara nga mediat që i mbajnë ison Erion Veliajt, mbi të cilin rëndojnë 13 akuza për 5 vepra të rënda penale, përfshirë korrupsionin pasiv në 9 raste, pastrim të produkteve të veprës penale, mosdeklarim pasurie, shpërdorim detyre dhe futje e sendeve të ndaluara në burg.

Sulmet ndaj prokurorëve dhe institucioneve të drejtësisë

Nga qelia, Veliaj ka vazhduar të publikojë postime në rrjetet sociale për të komentuar rreth hetimeve dhe akuzave penale, përmes së cilave nuk ka ngurruar të sulmojë individë në sistemin e drejtësisë. Pas arrestimit të tij të bujshëm më 10 shkurt 2025, Veliaj e ka përshkruar vazhdimisht procesin ndaj tij si të padrejtë, duke përdorur një gjuhë të fortë, vetëm e vetëm që të nxjerrë veten si viktimë të sistemit të drejtësisë.

Prodhimi i “fake news”-eve

Në lajmet e publikuara nga mediat e Veliajt janë evidentuar jo në pak raste ngjarje të prodhuara me përmbajtje të gënjeshtërt. Ngjarje këto që më pas rezultuan të pasakta, siç ndodhi në nëntor 2025 nga disa ‘pretendime’ për kërkesa të institucioneve ndërkombëtare për takime me Veliajn, që nuk ishin gjë tjetër veçse mashtrim.

Taktika propagandistike e Veliajt

Që nga dita e parë arrestimit, Veliaj nisi një sulm mediatik të vazhdueshëm dhe të pandalur, duke vijuar me të njëjtën taktikë prej më shumë se një viti. Veliaj ka vepruar me propagandë në mënyrë abuzive, praktikë që e përforcon në mënyrë “madhështore” veçanërisht kur afrohen gjyqe të rëndësishme apo çështje që lidhen me procesin e tij ligjor.

Erion Veliaj prezumohet i pafajshëm deri në momentin që gjykata do të japë vendime për akuzat e tij.

Por Veliaj vijon të jetë përballë drejtësisë, pasi ka bërë një lumë akuzash, sulmesh e lëvizjesh të ndryshme, duke iu shmangur drejtësisë dhe duke shtyrë seancat gjyqësore.

Veliaj nuk ka tentuar në asnjë rast të përballet me drejtësinë, të provojë pafajësinë e tij, sepse ai e di shumë mirë se çfarë ka në dosjet dhe dokumentet ndaj tij, ndryshe nga sa pretendon me propagandën e tij, që nuk e çon askund, veçse i rithekson faktin se është një kryebashkiak i arrestuar, që ndodhet prej më shumë se një viti në qeli me 13 akuza për 5 vepra të rënda penale./CNA

 





Lajmet e fundit nga