web counter
LEXO PA REKLAMA!

SHKARKO APP

App Store
Google Play

E fundit!

x

Emiratet e Bashkuara Arabe dënojnë sulmin ndaj tankerëve, SHBA-të intensifikojnë operacionet kundër Iranit

14 Korrik 2026, 07:54, Kosova & Bota CNA

Emiratet e Bashkuara Arabe dënojnë sulmin ndaj tankerëve,

Emiratet e Bashkuara Arabe kanë dënuar ashpër sulmin ndaj dy anijeve cisternë në Ngushticën e Hormuzit, për të cilin fajësojnë Iranin. Sipas autoriteteve emiratase, nga sulmi humbi jetën një anëtar i ekuipazhit, ndërsa tetë persona të tjerë mbetën të plagosur, mes tyre gjashtë shtetas indianë dhe dy ukrainas.

Ministria e Mbrojtjes e Emirateve e cilësoi ngjarjen si një sulm i paturpshëm dhe një shkelje të rëndë të së drejtës ndërkombëtare, duke theksuar se ai rrezikon sigurinë dhe stabilitetin në rajon.

Nga ana tjetër, Korpusi i Gardës Revolucionare Islamike të Iranit (IRGC) konfirmoi se kishte goditur dy tankerët, duke pretenduar se anijet kishin shpërfillur paralajmërimet, kishin fikur sistemet e navigimit dhe kishin tentuar të kalonin në një zonë të minuar.

Ndërkohë, Shtetet e Bashkuara kanë ndërmarrë një valë të re sulmesh ndaj objektivave ushtarake iraniane. Presidenti Donald Trump deklaroi se forcat amerikane po godasin “shumë fort” aftësitë ushtarake të Iranit dhe njoftoi rikthimin e bllokadës detare ndaj porteve iraniane.

Trump bëri të ditur gjithashtu se SHBA do të vendosë një tarifë prej 20 për qind për ngarkesat që kalojnë përmes Ngushticës së Hormuzit, duke argumentuar se kjo përbën kompensim për garantimin e sigurisë në një nga rrugët më të rëndësishme detare të botës. Sipas tij, të gjitha vendet do të vazhdojnë të kenë akses në ngushticë, ndërsa masa synon vetëm aktivitetet që lidhen me Iranin.

Në reagimin e tij, ministri i Jashtëm iranian Abbas Araghchi deklaroi se Irani ka qenë dhe do të mbetet “rojtari” i Ngushticës së Hormuzit, duke kundërshtuar çdo përpjekje të SHBA-së për të marrë kontrollin e rrugës ujore.

Ndërkohë, Komanda Qendrore Amerikane (CENTCOM) konfirmoi se ka goditur një sërë objektivash ushtarake në Iran, me synimin për të dobësuar kapacitetet iraniane për të sulmuar anijet tregtare. Në përgjigje, Irani njoftoi se kishte shënjestruar baza dhe objekte ushtarake amerikane në disa vende të rajonit.

Përshkallëzimi i tensioneve ka ndikuar edhe në tregjet ndërkombëtare, ku çmimet e naftës janë rritur ndjeshëm, mes shqetësimeve për sigurinë e furnizimeve globale përmes Ngushticës së Hormuzit, një nga korridoret më të rëndësishme për transportin e naftës dhe gazit në botë./ CNA





Lajmet e fundit nga