Paralajmërimi i Klodian Tomorrit: Vendimi për Ballukun, rrezik për integrimin e Shqipërisë

12 Mars 2026, 19:08, Aktualitet CNA

Paralajmërimi i Klodian Tomorrit: Vendimi për Ballukun, rrezik

Gazetari Klodian Tomorri paralajmëroi se vendimi i fundit i Kryeministrit Edi Rama dhe Partisë Socialiste për të mos i hequr imunitetin Belinda Ballukut mund të ketë pasoja serioze për procesin e integrimit të Shqipërisë në Bashkimin Europian.

Sipas Tomorrit, ky vendim nuk do të sjellë një reagim të menjëhershëm nga Brukseli, por mund të ndikojë kur të vijë momenti për votime në nivelet europiane, duke rritur rrezikun e veto-ve, sidomos nga Gjermania. Ai theksoi se vendimi “është një bombë që nuk shpërthen me zhurmë, por mund të bllokojë trenin e anëtarësimit për qytetarët shqiptarë”.

Gazetari vuri në dukje gjithashtu se integrimi në BE është i rëndësishëm për standardet e jetesës, lirisë dhe shërbimeve publike të shqiptarëve, dhe se vendimi për Ballukun kërcënon klimën pozitive që ishte krijuar për zgjerimin e Bashkimit Europian.

“Ky ishte një test kritik për integrimin europian, dhe Shqipëria e kaloi me sukses deri tani, por vendimet e tilla mund të ndryshojnë ndjeshëm perspektivën e anëtarësimit,” tha Tomorri.

“Unë nuk pres që Komisioni Europian të dali me shpatë dhe të thotë që shiko tani Shqipëria, integrimi i Shqipërisë u bllokua, Shqipëria përjashtohet, sepse këta burokratët e Brukselit Edi Rama i sistemon kollaj dhe e kemi parë në gjithë këtë historik. Por ky është një vendim dhe një veprim i cili qartazi e ka shkëputur Shqipërinë nga treni për në Bashkimin Europian, sepse do të ndodhi ajo që ne e dimë, pra do të ndodhin vetot.

Gjermania sigurisht ka për të, ka për të vendosur veto për proceset integruese të Shqipërisë dhe shqiptarët duhet të kuptojnë diçka. Pra, kjo është një bombë që nuk do shpërthejë me zhurmë, që ta dëgjojnë të gjithë që u bllokua, por do shpërthejë kur të vijë momentet për të votuar, kur të vijnë dhe rrezikon ta lërë vendin, që vendi të humbasë trenin e anëtarësimit.

Madje Edi Ramës nuk ka çfarë i duhet integrimi, sepse ai sigurisht që ai i ka kaluar standardet e Bashkimit Europian, ai është në rangun e sheikëve, ndoshta dhe më lart. Dhe nuk i duhet atij.

Anëtarësimi në Bashkimin Europian është për qytetarët shqiptarë, që të, që të kenë standardet e jetesës të Bashkimit Europian, që të kenë standardet e lirisë të Bashkimit Europian, që të kenë standardet demokratike të Bashkimit Europian, që të marrin shërbime publike si qytetarët e Bashkimit Europian e kështu me radhë.

Dhe pse është e rrezikshme e gjitha kjo që ka ndodhur? Është e rrezikshme edhe për një fakt tjetër. Ishte krijuar një klimë pozitive për procesin e anëtarësimit dhe procesin e zgjerimit të Bashkimit Europian. Për një sërë faktorësh gjeopolitikë.

Mund të ndodhë që kjo klimë pozitive mund të ndryshojë shumë shpejt. Dhe ne, historia na ka treguar që oreksi i Bashkimit Europian për zgjerim ndryshon në mënyrë të shpeshtë dhe nga një ekstrem mund të shkojë në ekstremin tjetër.

Imagjino çfarë ndodh që nëse ti humb trenin tani që e ke mundësinë dhe më pas klima për zgjerimin nuk është pozitive, do të duhet të presësh vite dhe dekada të të vijë radha sërish që të mund të anëtarësohesh në Bashkimin Europian. Pra ky, kjo është pasoja e madhe e këtij veprimi apo këtij, po themi, e këtij sfidimi të Bashkimit Europian.

Dhe ne e kemi patur të qartë sepse delegacioni i Parlamentit Europian erdhi në Shqipëri e tha publikisht, ky është një test kritik për integrimin Europian. Pra nuk kishte, domethënë si rrallë herë madje sepse unë nuk i kam falë, nuk i kam parë shpesh diplomatët e huaj apo politikanët që të flasin me gjuhë aq direkte. Këtu mesazhi ishte i drejtpërdrejtë, i qartë, që ky është një test kritik. Dhe tani ne këtë test kritik e kaluam me sukses, siç e pamë’, tha Tomorri. / CNA