BYD zbret Tesla-n nga froni

12 Korrik 2022, 09:01, Tech Edmond Laçi
BYD zbret Tesla-n nga froni
Makina e BYD

Për herë të parë që nga viti 2008, kur Elon Musk nxorri në shitje “Tesla”-n, krijesën e tij 100 për qind elektrike, është detyruar të lëshojë fronin. Kompania kineze BYD, që jo rastësisht do të thotë "Build Your Dreams" (Ndërtoni Ëndrrat Tuaja), sapo është konfirmuar si prodhuesja e automjeteve elektrike me numrin më të madh të shitjeve në botë. Sipas një raporti të Grupi Mediatik të Kinës (CMG), në 6 muajt e parë të vitit 2022 BYD shiti afro 641.000 automjete elektrike, me një rritje prej 300 për qind, krahasuar me të njëjtën periudhë të vitit të kaluar, ndërsa "Tesla" në janar-qershor arriti 564.000. Analistët e automjeteve nga "Citigroup" e quajtën “mbresëlënëse” rritjen e BYD, kompanisë me bazë në qytetin Shenzhen të provincës Guangdong të Kinës Jugore.

Ndërkohë "Tesla" fajësoi ndërprerjen e punës në fabrikën e saj të Shangait për shkak të ringjalljes së COVID-19, edhe pse gigastabilimenti i saj u mbyll vetëm tre javë gjithsej. Zakonisht “Tesla” prodhon rreth 2100 automjete në ditë. Megjithatë zbritja nga froni, përveç shpërthimit të kompanisë kineze,  besohet se ka edhe shkaqe të tjera. Agjencia Gjermane e Trafikut Rrugor zbuloi para pak ditësh se do të tërhiqte modelet Y dhe 3 të "Tesla"-s për shkak të një defekti në sistemin automatik, e cila prek rreth 60 mijë makina në të gjithë botën. Vetë Elon Musk pranoi në fillim të korrikut se kompania e tij kishte dorëzuar 17.9 për qind më pak automjete elektrike në tremujorin e dytë, në krahasim me tremujorin e parë të 2022-it. Në fakt “Tesla” ia kishte dorëzuar fronin BYD-it kinez edhe për shitjet e automjeteve në tregun kinez. Madje kompania e Musk u rendit e treta në këtë klasifikim, duke u kapërcyer edhe nga SAIC-GM-Wuling.

Kompania BYD, pjesërisht në pronësi të "Berkshire Hathaway"-it të Buffet-it, nuk ka ndërmend të kënaqet vetëm më kapërcimin e “Tesla”-s. Ajo sapo është shpallur edhe si prodhuesja e dytë për nga madhësia në botë e baterive të automjeteve elektrike, duke zbritur në vendin e tretë LG të Koresë së Jugut. Numri 1 në këtë sektor vazhdon të jetë kompania tjetër kineze "Contemporary Amperex Technology", e njohur edhe si CATL, e cila në 23 qershor lançoi një bateri për automjetet elektrike që mundëson udhëtimin e 1.000 kilometrave me një ngarkim të vetëm. Kompanitë kineze prodhojnë pa frikë duke ditur se kanë tregun më të madh në botë, pasi kryesojnë në distancë për shitjen e automjeteve elektrike. Vetëm gjatë 2021-it regjistrimet u trefishuan, duke bërë që në rrugët e gjigandit aziatik të udhëtojnë plot 3.3 milion automjete elektrike të reja, nga 6.6 milionë në të gjithë botën.

Evropa që u rrit me 65 për qind, arriti në 2.3 milionë, ndërsa SHBA që pothuajse pothuajse e dyfishoi numrin e automjeteve elektrike, kapi shifrën 630.000. Duke mbajtur afërsisht 60 për qind të shitjeve të automjeteve elektrike në rang global, Kina mban edhe numrin më të madh të stacioneve të karikimit në botë. Sipas Ministrisë së Industrisë dhe Teknologjisë së Informacionit, deri në fund të vitit 2021, Kina kishte ndërtuar 75.000 stacione karikimi, 2.62 milionë shtylla karikimi dhe 1298 stacione të ndërrimit të baterive.

Vetëm “Tesla” ka hapur deri tani më shumë se 1.200 stacione superngarkimi baterish dhe më shumë se 700 stacione ngarkimi në destinacion, duke mbuluar mbi 370 qytete dhe rajone në pjesën kontinentale të Kinës. Aktualisht në rrugët e botës qarkullojnë rreth 17 milion automjete full-electrik ose hibride plug-in, ose tre herë më shumë se në vitin 2018. Me këto ritme, bota shumë shpejt do përshëndesi “bye-bye diesel”. (CRI)

Lajmet e fundit nga