web counter
LEXO PA REKLAMA!

SHKARKO APP

App Store
Google Play

Botërori 2027 për vajza, Shqipëria barazon në transfertën ndaj Çekisë

5 Qershor 2026, 20:19, Sport CNA

Botërori 2027 për vajza, Shqipëria barazon në

Kombëtarja e vajzave siguroi një barazim të rëndësishëm 1-1 në transfertë ndaj Çekisë, në ndeshjen e vlefshme për kualifikueset e Kupës së Botës “Brazil 2027”.

Takimi i zhvilluar pasditen e sotme në stadiumin “FK Viktoria” në Pragë ishte i luftuar dhe me ritëm të lartë, ndërsa vajzat kuqezi treguan karakter dhe reagim të fortë pas disavantazhit. Golin e barazimit për skuadrën e drejtuar nga trajneri Armir Grima e realizoi Vanesa Levendi, duke i dhënë Shqipërisë një pikë të merituar në këtë transfertë.

Pjesa e parë u karakterizua nga një lojë e kujdesshme nga të dyja skuadrat. Çekia pati më shumë kontroll të topit dhe u afrua disa herë pranë zonës sonë, por mbrojtja kuqezi u tregua e organizuar dhe e vendosur, duke neutralizuar çdo tentativë të rrezikshme. Nga ana tjetër, Shqipëria krijoi dy raste të mira shënimi, por pa mundur të gjejë rrugën e rrjetës. Në përfundim të 45 minutave të para, rezultati mbeti i pandryshuar, 0-0.

Skuadra vendase kaloi në avantazh në minutën e 47-të, kur realizoi me një goditje nga qendra e zonës. Pavarësisht reagimit të portieres Rajmonda Spahiu, devijimi i saj nuk ishte i mjaftueshëm për të shmangur golin.

Vajzat kuqezi reaguan menjëherë dhe vazhduan të kërkonin golin e barazimit. Përpjekjet e tyre u shpërblyen në minutën e 69-të, kur Vanesa Levendi finalizoi me sukses një aksion të bukur, duke shfrytëzuar në maksimum asistin e Fortesa Berishës. Goli i Levendit riktheu ekuilibrat në takim dhe vulosi rezultatin përfundimtar 1-1, pavarësisht tentativave të mëvonshme nga të dyja skuadrat.

Kombëtarja e vajzave do të luajë ndeshjen e fundit të këtyre kualifikueseve të Kupës së Botës “Brazil 2027” ndaj Malit të Zi, më 9 qershor, në orën 19:00, në stadiumin “Loro Boriçi”.





Lajmet e fundit nga