Psikologia ngre shqetësimin/ Pas pandemisë janë rritur shumë rastet me probleme të shëndetit mendor

10 Tetor 2023, 15:06, Shëndeti CNA

Psikologia ngre shqetësimin/ Pas pandemisë janë rritur shumë

Psikologe klinike, Çiljeta Simaku

10 tetori është dita ndërkombëtare e personave që vuajnë nga probleme të shëndetit mendor. Në kuadër të kësaj dite u zhvillua një aktivitet në qytetin e Korçës, ndërsa vijon të mbetet problematik numri i personave të prekur.

Sipas psikologes klinike, Çiljeta Simaku, ka një rritje të numrit të të prekurve që është shtuar gjatë periudhës së pandemisë.

"Ajo që duhet të themi në këtë ditë, të mos harrojmë, sot është 10 tetori dhe nga Organizata Botërore e Shëndetësisë, kjo ditë është përcaktuar si dita ndërkombëtare e shëndetit mendor. Në çdo 10 tetor Organizata Botërore e Shëndetësisë jep një slogan të ndryshëm për këtë datë, dhe në këtë vit slogani është ndihma psikologjike që duhet të japim për persona që vuajnë nga problemet e shëndetit mendor. Dhe kjo ka të bëjë kryesisht jo me ata individë të cilët janë profesionistë të shëndetit mendor, por me të gjithë njerëzit të cilët kanë mundësinë, dashamirësinë, empatinë të ndihmojnë dhe përkrahin njerëzit me probleme të shëndetit mendor. Kjo do të thotë të gjithë ata që janë në linjën e parë dhe që ofrojnë shërbime në shëndetin mendor.

Problematikat e shëndetit mendor janë të shumta dhe ne nuk mund të flasim vetëm për 10 tetorin. Duhet të flasim çdo ditë të vitit dhe kjo ka të bëjë kryesisht me pjesën e ndërgjegjësimit të madh që duhet të kemi ne jo vetëm me komunitetin, por edhe me ata njerëz që punojnë në shërbimet shëndetësore. Janë rritur shumë rastet, sidomos pas pandemisë, me çrregullime ankthi, ka kartelizime të reja në qendrën komunitare të shëndetit mendor, ka individë të cilët paraqiten rregullisht dhe me thënë të drejtën ka njerëz të cilët vijnë pa komplekse për të marrë ndihmë. Sigurisht që ne kemi shumë për të bërë dhe kjo është një fushë që ne duhet të japim kontribut individual bashkë me kolegët për të ndihmuar dhe lehtësuar sado pak këta persona.

Statistika ka, ka kartela në qendrën komunitare, s'mund të them një numër të saktë. Por ka rritje dhe këtë e them me bindje, kryesisht çrregullimet e ankthit pasi ka edhe persona që marrin shërbim, por janë të pakartelizuar”, u shpreh ajo.

Ndonëse shërbimi që merret në Qendrën Komunitare të Shëndetit Mendor është shumë i mirë, duhet që të rriten kapacitetet dhe të shtohen hapësirat për akomodimin e këtyre personave.

"Standardet për kurim në aspektin e shërbimit i përmbushin qendrat, por jo në aspektin e sasisë ose të hapësirave që duhet të ofrojnë sepse ne vërtet kemi një institucion që ofron shërbim rezidencial, por duhen dhe të tjera institucione për të ofruar këto shërbime. Ai që është problemi më i madh është që zinxhiri i problematikave të shëndetit mendor duhet të fillojë nga qendrat komunitare tek ato rezidenciale, por dhe te shërbimet ose azili që ofron mbështetjen përfundimtare për këta persona.

Duhet të them me bindje të plotë duke qenë se jam pjesë e strukturës së shëndetit mendor prej shumë vitesh, që jo çdo individ, i cili kryen vepra penale është individ që vuan nga probleme të shëndetit mendor. Ka pasur raste që kanë qenë problematikë, por jo çdo person i cili i kryen këto vepra penale. Dua që ta përjashtoj këtë gjë sepse ata persona që janë në kujdesin e profesionistëve, nën medikamente mjekësore, janë gjithmonë nën kontroll dhe nuk bëjnë relapse të shëndetit mendor. Them që ata janë shumë mirë të trajtuar dhe të menaxhuar për të bashkëjetuar në komunitet si gjithë personat e tjerë”, theksoi Simaku.

Ndërgjegjësimi i personave që kanë çrregullime të ankthit fatmirësisht është shtuar dhe kjo mbetet pozitive për këta të fundit./ CNA