Dhjetë shenjat që tregojnë se po jetoni me arterie të bllokuara

28 Shtator 2023, 22:24, Shëndeti CNA

Dhjetë shenjat që tregojnë se po jetoni me arterie të

Arteriet e bllokuara, një gjendje e njohur edhe si ateroskleroza, mund të zhvillohen në heshtje përgjatë shumë viteve, duke rritur rrezikun e sëmundjeve serioze kardiovaskulare

si sulmet në zemër dhe goditjet në tru. Njohja e shenjave të këtij bllokimi është jetike për zbulimin dhe ndërhyrjen e hershme. Ja cilat janë 10 shenjat dhe simptomat më të zakonshme që mund të tregojnë se po jetoni me arterie të bllokuara, dhe duhet të kërkoni menjëherë kujdes shëndetësor.

1. Dhimbje gjoksi (anginë)

Një nga simptomat kryesore të arterieve të bllokuara është dhimbja ose shqetësimi në gjoks, shpeshherë i përshkruar si një ndjesi shtrëngimi ose presioni. Kjo dhimbje, e njohur si angina, zakonisht shfaqet gjatë aktivitetit fizik apo stresit emocional dhe mund të largohet pas një pushimi.

2. Frymëmarrje e rënduar

Nëse arteriet e bllokuara kufizojnë rrjedhjen e gjakut në zemër, mund të keni gulçim, veçanërisht gjatë sforcimit fizik. Kjo mund të jetë një shenjë e funksionit të dobësuar të zemrës tuaj.

3. Lodhja

Arteriet e bllokuara mund të zvogëlojnë furnizimin me gjak në pjesë të ndryshme të trupit, duke shkaktua simptomat e lodhjes dhe dobësisë. Nëse vuani nga kjo gjendje mund ta ndjeni veten të lodhur edhe pas një aktiviteti fizik minimal.

4. Dhimbje ose mpirje në këmbë (sëmundja e arterieve periferike)

Arteriet e bllokuara në këmbë mund të shkaktojnë dhimbje, ngërçe ose mpirje, veçanërisht gjatë aktivitetit fizik. Kjo gjendje njihet si sëmundja e arterieve periferike (PAD).

5. Disfunksioni erektil

Meshkujt me arterie të bllokuara, mund të kenë vështirësi në arritjen apo mbajtjen e ereksionit për shkak të uljes së rrjedhjes së gjakut në zonën e legenit. Disfunksioni erektil mund të jetë një shenjë paralajmëruese e hershme e problemeve kardiovaskulare.

6. Ftohje apo mpirje e gishtërinjve dhe këmbëve

Qarkullimi i dobët i gjakut i shkaktuar nga arteriet e bllokuara mund të çojë në ftohje ose mpirje të gishtërinjve dhe këmbëve, edhe kur koha është e ngrohtë.

7. Dëmtim i aftësive njohëse

Rrjedhja e reduktuar e gjakut në tru mund të ndikojë në funksionin e aftësive njohëse. Problemet me kujtesën, vështirësia në përqendrim dhe konfuzioni, mund të jenë shenja të një qarkullimit cerebral të dëmtuar.

8. Presion i lartë i gjakut

Arteriet e bllokuara e detyrojnë zemrën të punojë më shumë për të pompuar gjakun, dhe kjo çon në rritjen e presionit të gjakut. Hipertensioni i vazhdueshëm, mund të dëmtojë më tej arteriet dhe të rrisë rrezikun kardiovaskular.

9. Siklet në gjoks gjatë stresit apo vakteve ushqimore (angina e heshtur)

Disa individë përjetojnë siklet në gjoks, dispepsi ose ndjenjën e ngopjes pas ngrënies ose gjatë stresit emocional. Kjo njihet si angina e heshtur dhe nuk duhet të injorohet.

10. Ndryshimet në shikim

Arteriet e bllokuara mund të ndikojnë në enët e gjakut në sy, duke çuar potencialisht në probleme të shikimit apo humbje të tij. Shikimi i paqartë apo shqetësimet e papritura të shikimit duhet të nxisin një vizitë tek mjeku.

Zbulimi i hershëm dhe modifikimet e stilit të jetesës mund të zvogëlojnë ndjeshëm rrezikun e ndërlikimeve. Ndryshimet e stilit të jetesës, përfshirë pasjen e një diete të shëndetshme ushqimore për zemrën, ushtrimin e rregullt fizik dhe lënien e duhanit, mund të ndihmojnë në menaxhimin e arterieve të bllokuara dhe të zvogëlojnë rrezikun e ngjarjeve kardiovaskulare./ Përshtatur dhe përkthyer nga CNA