“Swim to Freedom”/ Sfida e distancës me not në Bunë, në përkujtim të ngjarjeve të komunizmit

9 Gusht 2025, 16:39, Qyteti im CNA

“Swim to Freedom”/ Sfida e distancës me not në Bunë,

Gjashtë burra dhe një grua zgjodhën të përshkojnë me not një distancë rreth 5 km deri në derdhje të Bunës në përkujtim të dhjetëra djemve e vajzave që thuajse 4 dekada më parë notuan nën presionin e armëve, duke sfiduar komunizmin e duke kaluar kufirin me not.

Organizatori Kliti Hoti tregon se ky është viti i dytë që po zhvillohet një aktivitet i tillë, por që synon të kthehet në traditë.

“E realizuam edhe këtë vit. Është vlerë për Shkodrën, është krenari dhe kënaqësi për të organizuar këtë aktivitet që tregon respekt në përkujtim të atyre djemve dhe vajzave që sfiduan komunizmin dhe na treguan se duhet luftuar fort për lirinë. Liria fitohet, nuk dhurohet dhe është jo vetëm kujtim, por edhe mirënjohje. Kishim pjesëmarrës edhe nga qytete të tjera të Shqipërisë dhe kjo tregon një afrimitet. Edhe emigrimi në ditët e sotme mund të jetë një mesazh edhe pse simbolika është tjetër”,-tha Hoti.

Pjesëmarrësit ishin notarë jo vetëm nga Shkodra, por edhe qytete të tjera. Të emocionuar, ata thonë se e pritën me kënaqësi ftesën për tu bërë pjesë e një kujtese që nuk duhet harruar.

“Asnjë problem. Jam kënaqur. Uji ishte i qetë, rrymat ujore të favorshme. E kam kaluar shumë bukur. Për mua është viti i parë që marr pjesë. Për mua ishte shumë emocionuese dhe më janë mbushur sytë me lot dhe kur po notoja më vinin në mendje gjithë kohën djemtë dhe vajzat që sfiduan komunizmin. Më ka mbushur me shumë frymëzim ajo histori dhe ky aktivitet në përkujtim të tyre”,-tha një pjesëmarrës.

“Relativisht e vështirë sepse kushtet ishin të mira, por gjithmonë garat janë të vështira. Më shumë ishte një aktivitet demonstrativ në përkujtim të djemve dhe vajzave që kaluan kufirin në atë kohë duke rrezikuar jetën për liri. Në gjithë historinë e Shqipërisë, emigrimi ka qenë një plagë e vjetër dhe ne gjithmonë rikthehemi tek ajo plagë e vjetër”,-tha një nga pjesëmarrësit.

“Shumë emocionues notimi këtu ndërsa erdhi koha të tregojmë edhe stërvitjen që kemi bërë gjatë gjithë vitit. Dua të falenderoj të gjithë notarët që morën pjesë dhe dhuruan një ditë të bukur. Për mua është hera e parë që marr pjesë. Pak e lodhshme, por e përballueshme. Disa asokohe në tentativë për t’u arratisur kanë humbur jetën dhe ne i përkujtuam me këtë aktivitet”,-tha një nga notarët e sfidës.

Të izoluar dhe nën kushte të vështira, dhjetëra djem e vajza morën guximin 39 vite më parë që përmes ujit të kalonin në Mal të Zi. Disa prej tyre arriten të arratiseshin e të tjerë mbetën të vrarë nga regjimi i kohës. Aktiviteti i sotëm nuk ishte vetëm një homazh, por edhe një mesazh i fortë drejt brezit të ri, për t'iu kujtuar se liria ka patur çmim./CNA