E fundit!

14:01 Live Updates

Irfan Hysenbelliu, mashtruesi që kërkon të dalë kundër shtetit

Irfan mashtruesi kundër shtetit 20 Korrik...

Hapet ekspozita “Nën Qyteti” e Anastas Kostandinit

13 Korrik 2025, 13:16, Qyteti im CNA

Një ekspozitë që tejkalon kufijtë e një galerie tradicionale dhe shndërrohet në një udhëtim emocional dhe historik përmes kujtesës së një qyteti. “Nën Qyteti” është titulli i ekspozitës më të re të piktorit pogradecar Anastas Kostandini, i njohur si Taso, e cila u hap mbrëmjen e së shtunës në Galerinë e Arteve në Pogradec.

Në këtë ekspozitë, përmes 31 vizatimeve të realizuara me një ndjeshmëri të veçantë dhe mjeshtëri artistike, Taso risjell fragmente nga historia e qytetit të tij, rrëfen jetën e dikurshme, tregon për traditat dhe rrënjët që formësojnë identitetin kolektiv të Pogradecit.

Për vetë autorin, kjo nuk është thjesht një ekspozitë arti, por një akt dashurie ndaj qytetit ku është rritur dhe që ka frymëzuar gjithmonë krijimtarinë e tij.

"E gjithë ekspozita është një himn për qytetin, për jetën e dikurshme, për jetën tonë, për traditat tona. Ekspozita është mbështetur mbi aftësinë time për të vizatuar e për të krijuar skena që lidhen me historinë e qytetit dhe periudha shumë të largëta. Kjo edhe për faktin se qyteti jonë ka shumë nevojë të jetë shumë i vetëdijshëm për identitetin e vet dhe mendoj se ky është një kontribut. Nëpërmjet 31 vizatimeve, unë zbuloj, udhëtoj nëpër memorien time, që shpresoj që qytetarët të ndihen të emocionuar", tha piktori.

Ekspozita vjen edhe me një qasje moderne dhe ndërvepruese. Në të gjithë qytetin janë shpërndarë bar code që korrespondojnë me veprat e ekspozuara. Çdokush që i skanon, mund të lexojë përshkrimin dhe historinë që fshihet pas çdo vizatimi, duke e shtrirë kështu ekspozitën përtej kufijve të galerisë dhe duke e bërë pjesë të përditshmërisë urbane.

"Ekspozita besoj që ka një paraqitje të veçantë, në gjithë qytetin janë shpërndarë bar code që korrespondojnë me vizatimet. Ti mund t’i skanosh ato dhe më pas të lexosh historikun e tyre. Është një punë komplekse dhe ekspozitë e veçantë për galerinë tonë”, tha piktori Taso.

I pranishëm në aktivitet ishte edhe regjisori dhe aktori i njohur Mevlan Shanaj, i cili vlerësoi si dimensionin estetik, ashtu edhe mesazhin qytetar të veprës.

"Është rasti të rithem që ky Taso të befason me kërkimet e tij për të bërë qytetin e Pogradecit. Një pogradecar i jashtëzakonshëm, si edhe piktor i zoti. Çdo vit ai sjell ekspozita por kjo e sotmja lidhet me diçka shumë të veçantë. Të gjitha këto punime janë punuar me një dashuri qytetarie. I ka dhënë Pogradecit një shikim shumë të veçantë, me një dimension qytetar. Tasoja e shikon si qytet europian, çdo gjë ka një lëvizje shumë të emancipuar. Pikërisht kjo është e veçanta e ekspozitës sipas meje. Unë ja njoh Tasos të gjitha punët, e përgëzoj", u shpreh aktori.

Ekspozita “Nën Qyteti” do të qëndrojë e hapur për vizitorët në Galerinë e Arteve, ndërsa përmes teknologjisë dhe përhapjes në hapësirën publike, ajo i jep qytetit një frymë të re, duke e kthyer Pogradecin në një galeri të hapur ku arti, kujtesa dhe qytetaria bashkohen./ CNA