2025, rreth 430 të rinj kërkuan të punësohen/ Zmijani: Garancia rinore synon integrimin e moshës 19-29 vjeç

9 Shkurt 2026, 14:36, Qyteti im CNA

2025, rreth 430 të rinj kërkuan të punësohen/ Zmijani:

Programi “Garancia Rinore”, i zbatuar prej tri vitesh nga Agjencia Kombëtare e Punësimit, vitin e shkuar ka pasur një interes të shtuar nga të rinjtë. Programi synon të rinjtë e moshës 18–29 vjeç, të cilët pas aplikimit pranë Zyrës së Punës, brenda një afati maksimal prej katër muajsh, kontaktohen për një ofertë punësimi ose përfshirje në kurse formimi profesional falas.

Drejtoresha e Zyrës së Punës në Shkodër, Rozafa Zmijani, bën me dije se vetëm gjatë vitit të kaluar janë regjistruar mbi 429 aplikime nga të rinjtë, ndërsa më shumë se 300 prej tyre janë kontaktuar dhe kanë marrë një ofertë konkrete, qoftë për punësim apo për trajnim profesional.

“Ne e aplikojmë prej 3 vitesh 'Garancinë Rinore'. Bëhet fjalë për atë grupmoshë nga 18-29 vjeç. Pas aplikimit te ne, Zyra e Punës brenda 4 muajsh duhet të kontaktojë punëkërkuesin për t'i dhënë një ofertë pune apo formimi falas. Kemi pasur një numër të lartë aplikimesh ku vetëm gjatë vitit të shkuar ne kishim mbi 429 kërkesa. Nga këto ne kemi mbi 300 persona të kontaktuar. Kjo nuk do të thotë që janë punësuar të gjithë, ama kanë marrë një ofertë pune apo kurs formimi”, tha Zmijani.

Përputhja mes kërkesave të tregut të punës, pritshmërive për pagën dhe dëshirave të të rinjve mbetet sfiduese, megjithatë qasja ka ndryshuar ndjeshëm, veçanërisht në sektorin e turizmit, ku pagat janë rritur dhe kushtet e punës janë përmirësuar.

“Kjo ka të bëjë me faktin që një i ri e di që brenda 4 muajsh do të kontaktohet për një ofertë pune dhe patjetër që është shtysë për të që të qëndrojë. Patjetër që përputhja me tregun, pagën, dëshirat e tij, është e vështirë. Ama qasja ka ndryshuar, sidomos në sektorin e turizmit. Pagat janë më të larta dhe kushtet më të mira”, u shpreh drejtoresha.

Programi “Garancia Rinore” vlerësohet si një nga instrumentet më të rëndësishme për integrimin e të rinjve në tregun e punës dhe për frenimin e emigracionit, duke ofruar alternativa konkrete punësimi dhe zhvillimi profesional në nivel lokal./CNA