Humbje therëse

8 Maj 2025, 16:07, Editorial CNA

Humbje therëse

Parashikimi duhet bërë para se të bëhen zgjedhjet dhe ndoshta shumë lexues, dashamirës, demokratë, socialistë, dikush do të fërkojë barkun dhe dikush do të mërzitet, dikush do të hedhë një sharje për këtë këndvështrim që në fakt detyrimisht duhet hedhur para zgjedhjeve për të treguar të vërtetën e gjithçkaje që është parë në këtë fushatë elektorale.

Nuk ka asnjë diskutim që ka qenë një fushatë ndryshe.

Nuk ka pasur një përballje me kandidatët. Sali Berisha tentoi të bënte gjithçka dhe me mbështetjen e amerikanëve. Edi Rama e ktheu në gëzim, në hare, në tallava, fushatën e tij. Ditët e fundit filloi të raportonte edhe ndonjë bilanc. Ka të njëjtin stil. Tashmë ndoshta i është mbushur mendja se të gjithë e ndjekin nga pas.

Rezultatet mund të jenë therëse aq sa kryeministri ynë përfundimisht besoi se shqiptarët e duan më shumë se këdo tjetër dhe nuk ka të dytë e të pazëvendësueshëm si ai që inshallah i ndodh diçka Edi Ramës që ai ta lëshojë pushtetin vetë se kështu do të shkojë keq e më keq.

Foto/ Rama në Kuç të Vlorës përllogarit mandatet në tavolinë
8 Maj, 14:35

OPOZITA NUK GJEN DOT KOMISIONERË

Në fakt, është e dhimbshme kur shikon që opozita nuk gjen dot komisionerë. Qarqet nuk po i përmendim, nuk po i shkruajmë, për të mos dhënë efekt negativ te PD-ja, që askush të mos pretendojë se e bëjnë se kanë këtë informacion apo mbështesin filan kandidat.

Janë disa qarqe që turpërisht PD-ja nuk po gjen dot komisionerë, të cilët nuk i kanë munguar as në vitin e zi 1997.

Dhe, kjo nuk është vetëm në zonat që dikur kanë qenë bastione socialiste apo ku ata fitojnë thellë, por edhe në zonat ku pretendohet që demokratët të marrin ndonjë rezultat, të kenë një ndryshim.

Është e dhimbshme dhe humbja duket se do të jetë therëse, sepse në momentin që në 48 orët e fundit të fushatës ti shikon se ka dhjetëra apo qindra persona, të cilët nuk pranojnë të shkojnë komisionerë dhe braktisin një detyrë që e kanë bërë dje, sepse besojnë që opozita nuk mund të fitojë, PD nuk mund të fitojë.

Projeksionet e Ramës për zgjedhjet/ Berisha: Qesharake, janë ditët e tij të fundit në zyrë
8 Maj, 15:56

Nga ana tjetër, nuk është tradhti e tyre, por kjo tregon një çorganizim të organizuar, një shkatërrim në gjenezë të strukturave. Është shumë e dhimbshme, është shumë therëse, siç e përmendëm dhe më lart, është e paimagjinueshme, që pas tri mandateve të Edi Ramës, ky i fundit të vrapojë, jo për mandatin e katërt, por pikërisht për të shkuar te strategjia e tij, Shqipëria 2030, që ka brenda edhe mandatin e tij të 5-të.

Duket qartë se nga ky moment alarmant që opozita ka probleme me komisionerë, nuk po flasim më pas për vëzhgues a grupe mbështetëse, etj.

Duket një dorëzim pa kusht përtej fasadës lart apo asaj që bën vetë Berisha e që është për t’u lavdëruar. Gjithçka poshtë duket e shpartalluar.

Një ushtri “e vdekur”, që ka një gjeneral 81-vjeçar me forcë dhe energji, e një strukturë të kalbur, të braktisur, që nuk jep shpresë, që nuk pranon të shkojë as në komisione, që do të thotë se ndoshta deri diku dhe nuk ekziston.

HUMBJE THERËSE

Një humbje therëse në të keqen e Shqipërisë për një arsye shumë të thjeshtë: papërmbajtshmëria e Edi Ramës do të jetë edhe më e madhe se kjo e sotmja.

Por, më mirë ta paralajmërojmë këtë copë opozitë se dhimbja e këtyre zgjedhjeve nuk do të jetë thjesht dhe vetëm humbja e saj, nuk do të jetë thjesht dhe vetëm fitorja e Ramës, pasaporta europiane ose joeuropiane, por është një çështje ekzistenciale e shtetit shqiptar, e së ardhmes së Shqipërisë, për shkak të faktit se do të dalim në një opozitë të rrënuar që mesa duket mund të marrë edhe më pak mandate se në vitin 2021./ CNA