Çështja e detit me Greqinë/ Meta: Çfarë i thashë Ramës për negociatat

22 Qershor 2022, 21:48, Politikë CNA

Çështja e detit me Greqinë/ Meta: Çfarë i

Presidenti Ilir Meta

Presidenti Ilir Meta është ndalur mbrëmjen e sotme te çështja e detit me Greqinë, për të cilën tha se ka qenë bashkëpunues.

Meta tregoi se gjatë kohës së negociatave i ka thënë kryeministrit Edi Rama të shkojë e të kërkojë tek ai autorizimin e ta zgjidhte vetë situatën, duke qenë se ishte edhe ministër i Jashtëm.

Kreu i Shtetit deklaroi se Rama asnjëherë nuk kërkoi një autorizim. Ai theksoi në "Aktualitet" se mbështet një zgjidhje të ndershme, të drejtë, larg lojërave të dyfishta.

“Është një çështje e ezauruar shumë qartë nga Institucioni i Presidencës. Presidenti ka qenë shumë i hapur dhe bashkëpunues për një zgjidhje në respekt të Kushtetutës sonë dhe vendimit të Gjykatës Kushtetuese, për këtë qëllim kemi dhënë edhe autorizimin për negociatat.

Më pas janë zhvilluar disa raunde negociatash dhe është kërkuar nga pala greke që të ketë një qasje politike, e cila nuk mund të bëhej nga negociatorët, sepse ata janë të mandatuar pikërisht për të zbatuar ligjin vendës dhe atë ndërkombëtar, si dhe për të negociuar në raport me ligjin.

Në këtë situatë unë i kam thënë zotit Rama, i cili ka qenë dhe ministër i Jashtëm, që nëse dëshiron ta zgjidhësh në këtë mënyrë, hajde kërko autorizimin dhe ta marrësh përsipër, sepse negociatorët nuk mund të bëjnë veprime të paligjshme.

Së dyti, ata nuk kanë ndonjë vullnet politik, përveç detyrës për të zbatuar ligjin dhe për t’iu referuar të Drejtës Ndërkombëtare dhe të drejtës sonë. Sepse në fund ti je udhëheqësi i mazhorancës, ajo që do të negociohet do të shkojë në Parlament që të votohet. Por nesër mund të shkojë përsëri edhe në Gjykatë Kushtetuese, nëse dikush ankohet dhe pa dyshim duhet ta marrë përsipër Qeveria që ta mbrojë këtë gjë.

Ai asnjëherë nuk kërkoi një autorizim, kur është e qartë që ka bërë veprime, ato që marrim vesh më shumë nga pala greke nga intervistat që jepen, të paautorizuara, të cilat ngrenë dyshime serioze mbi integritetin dhe qëllimet e kësaj sjelljeje në raport me interesat e Shqipërisë. Unë kam qenë dhe jam për një zgjidhje të ndershme, për një zgjidhje të drejtë, larg lojërave të dyfishta. Por kjo nuk mund të ndodhë kurrë jashtë transparencës dhe duke shkelur Kushtetutën e Shqipërisë”, nënvizoi Meta./ B.A. – CNA.al