122 milionë lekë për inceneratorin e Tiranës/ Kryebashkiaku demokrat i Kavajës sqaron pagesën

18 Shtator 2023, 20:36, Politikë CNA

122 milionë lekë për inceneratorin e Tiranës/ Kryebashkiaku

Në mbledhjen e këshillit bashkiak të Tiranës të ditës së premte, kryebashkiaku Erion Veliaj debatoi me opozitën për pagesat që i ka bërë inceneratorit të Tiranës.

Veliaj nxori një tabelë, ku tregohej se Bashkia e Kavajës, e cila drejtohet nga opozita, ka paguar 122 milionë lekë për inceneratorët.

Për deklaratën e Veliajt ka reaguar mbrëmjen e sotme Fisnik Qosja, kryetari i bashkisë Kavajë, i cili deklaroi se pagesa ishte një detyrim kontraktor i padiskutueshëm

Kryebashkiaku demokrat tha se ligji i qeverisë e detyron të paguajë faturën, pasi është një detyrim kontraktor i padiskutueshëm.

Megjithatë, ai theksoi se nuk është penduar aspak që ka paguar inceneratorin e Tiranës sepse pretendon se i ka bërë nder Kavajës për ta pastruar në pikun e sezonit turistik.

Veliaj nuk heq dorë nga inceneratorët: Ju shkuat me tanga të paguani 122 milionë lekë, ne do shkojmë me kostum
15 Shtator, 17:39

“E kisha të nevojshme që të sqaroj qytetarët e Kavajës për këtë çështje, jo për të bërë replikë me Erion Veliajn, sepse replika me Erion Veliajn dhe betejën me të e kemi fituar me 14 maj.

Këtij i ka ngelur ora prapë 'Kavaja-Kavaja-Kavaja', kështu që e ka marrë përgjigjen dhe do ta marrë kur të dojë dhe si të dojë, në lidhje me çështjen në fjalë.

Së pari, unë jam kryetari i Bashkisë Kavajë dhe kam detyrim t'ju përgjigjem qytetarëve të Kavajës për pastrimin e qytetit, sepse e kam marrë detyrën më 14 qershor në pikun e sezonit turistik, pra një atmosferë e pakëndshme në bashkinë e Kavajës, ku asgjë nuk funksiononte dhe ku nuk kemi gjetur as stilolaps dhe as letër.

Kur unë isha i detyruar të pastroja qytetin dhe të pastroja bregun e detit, ku kemi pasur mijëra turistë që kanë vizituar Kavajën këto kohë, kështu që detyra ime është që unë të marr masa dhe në bazë të rregullave që janë vendosur nga paraardhësit e mi, të vazhdoja rrugën dhe të bëja pagesën për inceneratorin dhe jo, nuk jam penduar fare që e kam bërë pagesën sepse i kam bërë nder Kavajës për ta pastruar.

Por kontrata e inceneratorit është aferë korruptive dhe kjo nuk ka diskutim, këtë e dinë të gjithë dhe jo vetëm unë si kryetar i bashkisë, këtë e thonë ekspertët dhe gjithë njerëzit. Pra, ka dalë në dritë e vërteta.

Por, duke qenë i kushtëzuar dhe duke qenë se mandati sa ka filluar, unë isha i detyruar të paguaja pagesën për inceneratorin sepse kam detyrim dhe ndaj qytetarëve dhe ndaj bizneseve.

Çështja e inceneratorit, presionin e ka në maksimum pasi i tillë është vetë ligji që është bërë nga qeveria që të detyron që t’i të shkosh të paguash faturën, një detyrim kontraktor i padiskutueshëm!”, nënvizoi Qosja./ CNA