LEXO PA REKLAMA!

SHKARKO APP

E fundit!

x

Fredi Beleri, në qeli/ Pse dështoi 5 herë lirimi i kryebashkiakut të zgjedhur të Himarës

17 Shtator 2023, 20:29, Politikë CNA
Fredi Beleri, në qeli/ Pse dështoi 5 herë lirimi i kryebashkiakut
Kryebashkiaku i zgjedhur i Himarës, Fredi Beleri

Të hënën e 18 shtatorit, kryebashkiaku i zgjedhur i Himarës, Fredi Beleri pritet të ketë përballjen e radhës në Apel, për të kërkuar lirimin e tij nga qelia.

Belerit, i është refuzuar 5 herë kërkesa për të dalë nga paraburgimi.

Konkretisht i është rrëzuar kërkesa një herë nga Gjykata e Vlorës, 2 herë nga Gjykata e Posaçme e Shkallës së Parë, një herë nga ajo e Apelit dhe një herë nga Gjykata e Lartë.

Të gjitha shkallët e gjykimit kanë vlerësuar se dyshimet për korrupsion në zgjedhje janë të arsyeshme dhe të bazuara në prova.

Në argumentin e Gjykatës së Posaçme thuhet se kryebashkiaku i zgjedhur i Himarës mund të largohet nga vendi.

“Gjykata ka arsyetuar se për shkak të personalitet të personit nën hetim Dhionisios Alfred Beleri, duke qenë se ka qenë i dënuar më parë, ekziston rreziku real që ai të kryejë vepra penale më të rënda ose njësoj të rënda… për shkak të veprës penale për cilën dyshohet, marzhit të dënimit dhe qëndrimit të personit nën hetim, ekziston rreziku real që ai të largohet duke pamundësuar zhvillimin normal të hetimit… për shkak të pozicionit të personit nën hetim ekziston rreziku që ai të ndikojë në marrjen apo vërtetësinë e provave”, deklaron GJKKO.

Gjykata e Apelit përdor arsyetimin se mund të pengojë hetimin apo edhe të prishë provat.

“Gjykata mban parasysh edhe faktin e referuar nga prokuroria në seancë në gjykimin në Apel se në procesverbalet e vëzhgimit ambiental, nga këqyrja e fotove të ambienteve të lokalit ku janë kryer takimet ndërmjet Z. Dhionisios Alfred Beleri dhe Z. Arsen Rama dhe Z. Pandeli Kokaveshi dhe Z. Arsen Rama, kuptohet se lokali ka kamera sigurie dhe se megjithëse ky fakt ka rezultuar i tillë edhe brenda ambienteve të këtij lokali nuk është bërë e mundur deri më tani sekuestrimi i pajisjes së regjistrimit të kamerave të lokalit”.

Ndërkohë, Gjykata e Lartë përmend dënimin me 3 vjet burg të 2006-ës dhe faktin që nuk ka shkuar asnjëherë në qeli, pasi i është shmangur procedimit penal.

“Ai i është shmangur dënimit penal të caktuar ndaj tij më parë nga gjykatat për veprat penale për të cilat është dënuar “thirrja për urrejtje nacionale” dhe “poshtërim i Republikës dhe i simboleve të saj”, çka tregon se personi nën hetim Beleri ka një prirje dhe paraqet rrezik jo vetëm për t’u larguar, por edhe për të kryer krime të rënda, ose të të njëjtit lloj, me atë për të cilin procedohet.”

Në përballjet e tij me gjykatën, kryebashkiaku i zgjedhur i Himarës ka mohuar akuzat ndaj tij, me pretendimin se janë të motivuara politikisht.

Megjithatë, të gjitha shkallët e gjyqësorit e shohin më të sigurt vijimin e hetimeve me Fredi Belerin në qeli./ CNA

Lajmet e fundit nga