E fundit!

23:05 Horoskopi

Horoskopi, e shtunë, 30 shtator 2023/ Çfarë kanë parashikuar yjet për shenjat e zodiakut

DASHI Gjatë orëve në vijim, kushtojini vëmendje marrëdhën...

Sikur t’i kishte bërë Berisha këto?

13 Mars 2023, 19:28, Opinione Hysni Gurra

Hysni Gurra

A imagjinoni dot se çfarë do të kishte ndodhur në këtë vend? Se çfarë do të bënte opozita? Shoqëria civile? Media? Ambasadorët (ai amerikan në veçanti) nëse në kohën që qeveriste Berisha do të ishte:

1- Hakëruar gjithë e-albania?

Çfarë do të bënte opozita e kohës e kryesuar nga Rama dhe “bashkimet profesionale të tij?

2- Po sikur në kohën e Berishës të ndodhte skandali i inceneratorëve? 430 milionë euro? Një skandal që brenda një dite të firmosë 17 letra qeveria? Imagjinoni dot që pa patur inceneratorë fizik si rasti i Tiranës dhe dy inceneratorë (Fier, Elbasan), që përveç parave publike nuk djegin asgjë tjetër? 80 mijë euro në ditë?

3- Imagjinoni dot që në kohën e Berishës të kishte një skandal para syve: dy TEC-e lundruese rrangallë në Vlorë që konsumojnë 90 mijë euro në ditë pa prodhuar asnjë vat enegji?

E imagjinoni dot që do të buçiste vendi, që grupin parlamentar të opozitës do ta kishe në Vlorë, që shoqëria civile do të bënte namin dhe media do të ulërinte?

4- Imagjinoni dot se çfarë do të ndodhte po të kapej me zë dhe figurë një pastruese (ministrie) me 500 mijë euro kesh? Për këtë e kemi një ide se për një video të montuar dhe “fjalë pazari” bënë 11 janarin dhe jo vetëm derdhin lotë krokodili, por kanë edhe pafytyrsinë të flasin për hetime.

5- Ky vend do të ishte djegur nëse me zë dhe figurë do të dilte kryeministri, ministrat, deputetët, kryetarë bashkie, oficerë policie dhe do të kapeshin në përgjime duke masakruar zgjedhjet në Dibër e në Durrës. Imagjinoni të kapeshin banditët me presh në dorë si në Elbasan?

6- Për rrugën e Kombit, Rama doli dhe tha publikisht: “Rruga që nuk na çon askund. Kaq lekë që janë harxhuar do ishin bërë kaq kopshte e shkolla”. Imagjinoni se çfarë do të bënte ky njeri nëse kilometri i autostradës do të shkonte 20 milionë euro si sot dhe që për 10 vjet nuk mbaron dot as 2 km rrugë te Astiri?!!!

7- E mbani mend këtë tipin që tha: “Enver Hoxha të ngrihet nga varri nuk ua shemb njeri shtëpitë”. Ky ka shembur më shumë shtëpi se të gjithë tërmetet që kanë rënë në Shqipëri këto 500 vitet e fundit. Imagjioni se çfarë do të bëhej nëse do të ishte Berisha që do të shembte me dinamit në mes të ditës hotelin te Mali i Robit? Po sikur të ndodhte në kohë të Berishës që të dilte një hyzmeqar pushteti dhe të thoshte: shtëpitë 50 vjeçare mund të shëmben?

8- Imagjinoni dot që në kohën e Berishës të dilte DEA amerikane dhe të kërkonte ndihmë qytetarëve për të denoncuar trafikatët e drogës.

E imagjinoni dot si do të kërcente nga një televizor në tjetrin Edi Rama dhe bodigardët mediatikë që sot mezi po e mbrojnë? Imagjinoni që të arrestohej ministri i Brendshëm i Berishës për trafik droge? Do të ishte tundur bota.

9- Po të kishte ndodhur në kohën e Berishës afera McGonigal?

Po të kishte ndodhur në kohë të Berishës që shefi i SHISH apo drejtori i policisë të hiqej vetëm pse ishin pro amerikanë?!

10- E mbani mend sa herë dhe ku diskutohej renditja e Shqipërisë sipas Transparency International. E mbani mend se çfarë bëhej në Parlament dhe në konferenca shtypi. Po sot që gjatë 10 viteve të Ramës gjendja ka ardhur duke u përkeqësuar dhe Shqipëria renditet e fundit në Europë?...

Ka dhjetëra skandale të paimagjinueshme, që sot janë të pashmangshme, të qeverisë 10 vjeçare Rama. Skandale aq të shumta sa kanë zhvlerësuar edhe vetë fjalën skandal.

Çdo ditë po të mbash shënim ka një ngjarje të rëndë. Asgjë nuk ndodh.

Dhe për fund fare mendoni pak si vepronte qeveria dhe drejtësia në kohën e Berishës pas një ngjarje të rëndë dhe si vepron qeveria Rama që çdo ditë ka një skandal dhe çdo javë një superskandal?

Thirrini pak kujtesës dhe vini pak në punë imagjinatën dhe nxirrni përfundimin vetë.

Kishte skandale kur ishte Berisha kryeministër. Po krahasoni pak intesitetin e skandaleve të asaj kohe me këtë sot.

Kujtoni pak reagimet e asaj qeverie pas çdo skandali dhe reagimet e asaj drejtësisë së keqe pas çdo skandali dhe kësaj të 10 viteve të fundit.

Kujtoni shumat e aferave të përfolura korruptive të asaj kohe me këtë sot.