“Marsi” i Enxhi Drapit, arti i dedikuar fëmijëve jetimë

6 Korrik 2022, 12:46, Kulturë CNA

“Marsi” i Enxhi Drapit, arti i dedikuar fëmijëve

"Mars, ke që në Mars që kërcen Vals", titullohet libri i ri nga Enxhi Drapi, i cili sapo ka dalë në treg.

Ky botim është një vëllim me poezi të cilin ne të gjithë e prisnim me shumë kërshëri, sa nga fakti se autorja na kishte lajmëruar disa kohë më parë se po punon për të, po aq edhe nga kurioziteti që kishim për ta lexuar Enxhin në poezi, pas suksesit që pati me romanin e saj të parë të titulluar “Diku ku dielli nuk perëndon”.

"Marsi" i Enxhit është sa një dhuratë për të gjithë ne, vlerë e shtuar e letërsisë cilësore, po aq edhe dedikim për mamanë e saj, e cila quhet Marsela, gjë e cila tërhoqi vëmendjen sepse për të disatën herë ajo zgjedh t’i dedikojë suksesin e saj mamasë së saj që me sa duket është mbështetja e saj më e madhe.

Marsi që kërcen Vals ka tërhequr vëmendjen e shumë kritikëve duke përmendur këtu shkrimtarin Agron Shele, Agim Lika, Kurt Kola.

…Nëse poezia nuk lind me të njëjtën natyshmëri si gjethet e një peme, më mirë të mos lindë fare”- John Keats.

"Jo pa qëllim e citova këtë shprehje të Keats, pasi në frymën përshkruese të autores gjen natyralizëm dhe ndjesi të njëjtë, e cila vjen në mënyrë krejt spontane, merr formë, strukturohet dhe prek tematikën e jetës, me të gjitha ngjyrimet dhe dritëhijet, e dukshme dhe përjetuese, si në një vegim dhe meditim që kërkon të zbardhë idetë dhe mesazhin e përcjellur. Performimi i Enxhit në poezi ka dhe një sërë prezantimesh brenda dhe jashtë vendit, kryesisht në anglisht dhe në Antologji Ndërkombëtare, përvojë kjo që ka ndikuar dukshëm në formimin, por dhe sfidën e përballjes me artin bashkëkohor sot…” – Agron Shele

“…Mjeshtërisht Enxhi arrin që edhe në poezitë me varg të lirë të na 'qerasë' me proza poetike të rrallëpara për nga stili, gjë që vjen prej shkallës së lartë të vetëkërkesës artistike, sqimës së spikatur letrare, si dhe përmes kultivimit libresk vetjak. Dhe kjo përbën një tjetër risi të fortçmueshme!...” – Agim Lika

…Ti Helen je Shekspiriane: 'pak fjalë e shumë art'. Vargu yt është mahnitës, të depërton thellë në shpirt dhe të jep freskinë dhe forcën që i nevojitet çdo inividi. Kushdo që do të marrë në duar shkrimet e tua është me fat, sikurse unë që pata fatin t’i lexoja poezitë e 'Marsit' tënd para të gjithëve!...” – Kurt Kola.

Simboli i këtij libri është lulja e qershisë, e cila është e preferuara e autores dhe jemi të bindur se shumë shpejt do të kthehet edhe në të preferuarën tuaj. Një libër në qendër të së cilit përveçse fshihet femra, fshiheni ju dhe emocionet tuaja. Me anë të “Mars” Enxhi vjen para lexuesit me një përmbledhje poetike, duke artikuluar një individualitet në lëndën dhe ndjesitë që përcjell, në përdorimin e mjeteve poetike dhe në fuqinë komunikuese që ka për të ndërvepruar me lexuesit. Në vargun e saj spikat aftësia për të ndërtuar imazhe përmes metaforës dhe guximi për të prekur fenomene apo ngjarje që jo çdo autor do të guxonte të publikonte.

Libri i parë i juristes, romani “Diku ku dielli nuk perëndon”, është shkruar gjatë karantinës. Shumë kritikë letrarë e kanë vlerësuar si një roman të guximshëm, që godet fort mentalitetin e shoqërisë. Dielli për këdo përfaqëson një lëmsh zjarri, i cili ndriçon, por autorja e këtij romani na bën ta shohim diellin në një tjetër këndvështrim. Megjithatë, ky roman i përvidhet protagonistit, sepse në të vërtetë nuk e ka një të tillë.

Diku ku dielli nuk perëndon na përball me historinë e Helen, një vajze në dukje të thjeshtë dhe të dobët, por e cila arrin t'u bëjë ballë sfidave, sëmundjeve dhe kërcënimeve dhe jo të thjeshta. Ajo është vajza e një inxhinieri ndërtimi, i cili kthehet në një vrasës të sëmurë dhe herë pas here të pamëshirshëm. Një histori rrënqethëse dhe intensive, e cila bazohet në ngjarje të vërtetë, sepse krimi, dashuria, dështimi, fitoret, zilia dhe paragjykimet janë pjesë e jetës së kujtdo.

Përveç të tjerash Enxhi Drapin mund ta ndiqni edhe në emisionin e saj të përjavshëm të titulluar “Diku ku dielli nuk perëndon” çdo të enjte në orën 19:00 live në Radio "Eklipsi". Një emision risi, i cili na jep sa informacione të nevojshme juridike “Pa gënjeshtra” po ashtu edhe na njeh me artin dhe artistët bashkëkohorë përmes “HelenArt”.

Vlen për t’u përmendur se autorja të gjitha fitimet do t'i dërgojë për bamirësi për fëmijët jetimë. Lexim të këndshëm!/CNA.al

Lajmet e fundit nga