LEXO PA REKLAMA!

SHKARKO APP

Kosovë, vendosen çmimet maksimale për karburantet

27 Qershor 2022, 22:02, Kosova & Bota CNA
Kosovë, vendosen çmimet maksimale për karburantet
Foto ilustruese

Ministria e Industrisë, Ndërmarrësisë dhe Tregtisë në Kosovë, përcaktoi të hënën çmimet maksimale të lejuara për derivate të naftës në vend, disa ditë pasi qeveria miratoi udhëzimin administrativ për rregullimin e çmimeve të derivateve të naftës dhe karburanteve të ripërtëritshme.

Sipas vendimit, çmimi maksimal për një litër naftë është vendosur 1.85 euro, për benzinën 1.74 euro dhe për gazin 0.78 cent.

“Çmimet vlejnë nga ora dhjetë e datës 27 qershor dhe janë të vlefshme 24 orë”, thuhet në vendim.

Kosova po përballet me ngritje të çmimit të naftës si pjesë e një vale të re çmimesh në tregjet e naftës dhe gazit në tërë botën, për shkak të agresionit rus në Ukrainë. Rusia është një prej eksportuesve më të mëdhenj të naftës dhe gazit në tregun botëror.

Qytetarët thonë se çmimet e reja kanë vështirësuar në masë të madhe jetën e tyre.

Janë shpenzime të përditshme, gjëra të detyrueshme t’i shpenzosh për të funksionuar, çmimet thjesht janë dyfishuar dhe janë shpenzime të tjera në të gjitha fushat që ndikojnë”, thotë Blerim Syla, banor i Prishtinës.

Partitë opozitare kanë kritikuar qeverinë e Kosovës për mënyrën e trajtimit të situatës së ngritjes së çmimeve, duke kërkuar ulje të akcizës për naftën si dhe të Tatimit mbi Vlerën e Shtuar, që të mundësohet ulja e çmimeve.

Qeveria e Kosovës e kundërshton një ide të tillë, ndërsa e arsyeton udhëzimin administrativ me mospërputhjen e çmimeve në Kosovë me lëvizjet në tregjet botërore.

Njohësi i fushës së ekonomisë, Lekë Musa, tha në një bisedë me "Zërin e Amerikës" se përcaktimi i shkallës së fitimit është ndërhyrje në çmim dhe si e tillë është praktikë e tejkaluar.

Duhet edhe të shihet në mënyrë reale sa është margjina e fitimit sepse mos të harrojmë duhet ditur a po flasim për fitimin bruto apo neto, fitimi bruto ka pastaj edhe shumë shpenzime tjera që nuk përfshihen dhe kompanitë mund të punojnë me humbje. Kësisoj e tëra që bëjmë është të shkatërrojmë industrinë e importit dhe shitjes me pakicë të derivative të naftës dhe kjo kthehet bumerang në ekonomi, në vende të punës që ka ky sektor dhe sjell atë efektin multiplikativ të cilin nuk e dëshirojmë në ekonomi”, thotë ai.

Zoti Musa propozon që në përgjigjie të situatës së krijuar me çmimet, për një periudhë të caktuar kohore të hiqet akciza për karburantet.

Kjo do të ketë efekt të madh edhe në buxhetin e shtetit sepse një shumë mjaft e madhe e parave mblidhen prej akcizës, dhe ndoshta të shihet se ku mund të ketë shkurtime buxhetore në këtë periudhë kohore derisa të kalohet kjo krizë, ndoshta në investime kapitale apo aty ku ka hapësirë, sepse në kohë krizash duhen gjetur alternativa të cilat janë të përshtatshme”, tha ai.

Vendimin e sotëm e kundërshtoi edhe Aleanca e Bizneseve të Kosovës, duke e vlerësuar si ndërhyrje të padrejtë të qeverisë në ekonominë e tregut. Nëpërmjet një reagimi me shkrim, ky institucion paralajmëroi se do ta dërgojë në gjykatë për shqyrtim udhëzimin administrativ të qeverisë, ndërsa bëri thirrje, siç thuhet, të mos dëbohen bizneset deri në sqarimin përfundimtar të organeve ligjore.VOA

Lajmet e fundit nga