Europa kritikohet për trajtim “çnjerëzor” të emigrantëve

30 Mars 2023, 14:47, Kosova & Bota CNA

Europa kritikohet për trajtim “çnjerëzor” të

Foto ilustruese

Organi më i lartë për të drejtat e njeriut në Europë e ka kritikuar trajtimin "çnjerëzor" të emigrantëve në kufijtë europianë, veçanërisht në kufirin e jashtëm të Bashkimit Europian.

Emigrantët kishin pësuar “grushte, shuplaka, goditje me shkopinj dhe sende të tjera të forta... nga policia ose rojet kufitare”, thuhet në raportin vjetor të Komitetit të Këshillit të Europës për Parandalimin e Torturës (CPT), të publikuar të enjten, më 30 mars.

“U përdorën edhe forma të tjera të trajtimit çnjerëzor dhe poshtërues, si gjuajtja e plumbave pranë trupave të njerëzve ndërsa ata ishin të shtrirë në tokë”, thuhet më tutje në këtë raport.

Në raport theksohet se disa taktika të tjera përfshinin “shtyrjen e tyre në lumenj (ndonjëherë me duart ende të lidhura), heqjen e rrobave dhe këpucëve dhe detyrimin të ecin zbathur dhe/ose me të brendshme dhe, në disa raste, edhe plotësisht të zhveshur përtej kufirit”.

CPT-ja tha se ishte përballur me “një numër në rritje” të njerëzve që pretendonin se ishin larguar nga kufiri europian me forcë.

“Shumë vende europiane përballen me sfida shumë komplekse migracioni në kufijtë e tyre, por kjo nuk do të thotë se ata mund të shpërfillin detyrimet e tyre ndaj të drejtave të njeriut. Largimet me forcë janë të paligjshme, të papranueshme dhe duhet të marrin fund”, tha kreu i CPT-së, Alan Mitchell.

Ky komitet i kishte vizituar pikat e policisë së rregullt dhe asaj të kufirit, dhe rojës bregdetare, qendrat e paraburgimit dhe zonat e transitit në rrugët kryesore të migracionit për në Europë.

CPT-ja u bëri thirrje vendeve anëtare të Këshillit të Europës që të garantojnë të drejtat e emigrantëve duke regjistruar secilin individ, duke u ofruar atyre vlerësime mjekësore dhe cenueshmërie dhe duke u ofruar mundësinë e aplikimit për azil.

“Arrestimi duhet të përdoret vetëm si masë e fundit”, thuhet gjithashtu në raportin e publikuar.

Këshilli i Europës përbëhet nga 46 vende. Rusia ishte përjashtuar pas pushtimit të paprovokuar të Ukrainës vitin e kaluar, por ajo mbetet palë e Konventës Europiane për Parandalimin e Torturës.

Emigrantët mbeten çështje diskutimi në Bashkimin Europian që kur më shumë se një milion njerëz kishin mbërritur në Europë gjatë krizës së refugjatëve në vitet 2015-'16.

Numri i përpjekjeve të emigrantëve për të hyrë në Europë arriti në 330.000 në vitin 2022, 64 për qind më shumë sesa një vit më parë, tha agjencia kufitare e BE-së, Frontex./ Rel