web counter
LEXO PA REKLAMA!

SHKARKO APP

App Store
Google Play

E fundit!

x

"Amnesty": Përgjigjja e fortë globale ndaj luftës së Rusisë në Ukrainë ekspozon "standardet e dyfishta" mbi të drejtat e njeriut

29 Mars 2023, 16:02, Kosova & Bota CNA

"Amnesty": Përgjigjja e fortë globale ndaj luftës

Sipas një raporti vjetor të publikuar nga "Amnesty International" të martën, përgjigjja globale ndaj agresionit të Ukrainës nga Rusia duhet të shërbejë si një shembull për trajtimin e shkeljeve masive të të drejtave të njeriut. Siç njofton korrespondenti i "Zërit të Amerikës", Henry Ridgwell, nga Londra, grupi akuzon gjithashtu Perëndimin se ka injoruar krizat e tjera.

"Amnesty International" thotë se agresioni rus ndaj Ukrainës në shkurt 2022 solli "shkatërrim ushtarak mbi një popull dhe vend në paqe".

“Pamë votimin në Asamblenë e Përgjithshme të OKB-së për të dënuar sulmin e Rusisë, që ishte diçka e mirë. Gjykata Ndërkombëtare Penale hapi një hetim për krimet e luftës ndërsa vendet perëndimore hapën kufijtë e tyre për refugjatët ukrainas. Për ne, këto masa ishin me të vërtetë një shembull për t’u ndjekur në trajtimin e shkeljeve masive të të drejtave të njeriut”, thotë Philip Luther i organizatës "Amnesty International".

Rusia mohon kryerjen e mizorive apo vënien në shënjestër të civilëve në Ukrainë, pavarësisht provave të shumta.

Në raportin e saj vjetor të publikuar të martën, "Amnesty International" thotë se përgjigjja ndërkombëtare ndaj pushtimit ekspozoi standardet e dyfishta të shumë vendeve që dënuan Rusinë – por që nuk kanë vepruar ndaj krizave të tjera të të drejtave të njeriut.

“Duhet solidaritet me popullin ukrainas, por edhe me popullin palestinez, popullin e Eritresë, popullin e Mianmarit. Dhe kjo nuk ndodhi në vitin 2022”, thotë Agnes Callamard, sekretare e përgjithshme e "Amnesty International".

Raporti përmend luftën e Tigrait Perëndimor në Etiopi, që sipas disa vlerësimeve ka vrarë qindra mijëra njerëz.

Raporti thotë se viti 2022 ishte viti më vdekjeprurës prej një dekade për palestinezët në Bregun Perëndimor, me të paktën 151 njerëz, përfshirë dhjetëra fëmijë, të vrarë nga forcat izraelite. Izraeli pretendon se po vë në shënjestër terroristët – dhe thotë se 23 nga qytetarët e tij u vranë në sulme terroriste.

"Amnesty International" thekson gjithashtu shtypjen e vazhdueshme të pakicave Karen dhe Karenni në Mianmar – me qindra të vrarë dhe të paktën 150 mijë të zhvendosur.

Në Iran, protestat antiqeveritare shpërthyen në shtator pas vdekjes së 22-vjeçares Mahsa Amini në paraburgim nga policia. "Amnesty" thotë se forcat e sigurisë qëlluan me municion të vërtetë për të shtypur demonstratat, duke vrarë qindra burra, gra dhe fëmijë.

"Amnesty International" akuzon Kinën për përpjekjet për të heshtur kritikat ndërkombëtare mbi abuzimet e të drejtave të njeriut kundër myslimanëve ujgurë, të parashtruara në një hetim të OKB-së.

“Këshilli i OKB-së për të Drejtat e Njeriut dështoi të urdhërojë veprime të mëtejshme, sepse në thelb Kina u lejua të përdorte taktikat e saj të forta për të parandaluar shqyrtimin apo përgjegjësinë e mëtejshme”, thotë Philip Luther.

2023-shi është 75-vjetori i Deklaratës Universale të të Drejtave të Njeriut – miratuar nga Kombet e Bashkuara pas Luftës së Dytë Botërore.

Në raportin e saj, "Amnesty International" thotë se ky vit duhet të jetë një pikë kthese për mbrojtjen e të drejtave të njeriut./ VOA





Lajmet e fundit nga