Dita e 2-të e Forumit të Investimeve BE-BP/ Rama: Çdo institucioni qendror do t'i zgjerojmë trurin me IA

2025-10-14 12:35:00, Politikë CNA

Dita e 2-të e Forumit të Investimeve BE-BP/ Rama: Çdo

Kryeministri Edi Rama ka qenë i pranishëm sot në ditën e dytë të forumit të Investimeve WB6- Bashkimi Europian, në aktivitetin Hackathon-i Rajonal i Inteligjencës Artificiale 2025.

Ky aktiviteti ka bërë bashkë 161 pjesëmarrës nga i gjithë Ballkani Perëndimor dhe diaspora, me synimin për të zhvilluar zgjidhje konkrete të bazuara në inteligjencën artificiale për sfida reale shoqërore.

Gjatë fjalës së tij, Rama u shpreh se qeveria do të hapë dyert për të gjithë inovatorët që të mund të aksesojnë nga afër të gjitha instituionet. Ai shtoi po ashtu se do të punohet që çdo institucion qendror të pajiset me Inteligjencë Artificiale. Rama theksoi se qeveria do të mbështesë çdo inovator.

"Kjo përpjekje ka nisur me një varkë që ishte AKSHI i asaj kohe dhe tani është bërë një anije që na motivon se sa shumë mund të bëjmë akoma. Dua t’ju them që kemi rënë dakord të çojmë përpara procesin duke hapur dyert e qeverisë për të gjithë inovatorët dhe duke krijuar një hapësirë të përbashkët me agjensinë e ekselencës të cilën do ta vëmë në dispozicionin tuaj. Duam që “start up”-et dhe inovatorët të mund të aksesojnë institucionet dhe të shohin nga afër statistikat. Duke bërë këtë do të mësojmë shumë gjëra të reja nga njëri tjetri dhe do të prodhojmë produkte të reja. Do të mundohemi që çdo institucioni qendror t'i zgjerojmë trurin me Inteligjencë Artificiale.

Këtu më thanë që janë 161 ide të paraqitura për të cilat është bërë një seleksionim paraprak. Por njëri do të shpërblehet me një vajtje në Finlandë ku do të marrë pjesë në betejat që zhvilloni me mullinjtë e erës. Është bekim që jetojmë në këtë kohë kur teknologjia dhe IA na japin një mundësi që pa të cilën nuk do të ëndërronim të kapnim majat. Burokracia jonë dhe strukturat tona nuk janë aq të rënda sa vendet e tjera si Gjermania apo Franca për të kaluar në fazat e tjera të zhvillimit. Besoj që jo vetëm nuk do t’ju mungojë vëmendja por nuk do të kursejmë mbështetjen për të gjithë inovatorët me aq mundësi që kemi. Mezi pres që ministrja të organizojë sesionin e parë të Kuvendit që kemi rënë dakord me ju për të analizuar se çfarë mund të bëjmë.", tha Rama. /CNA