Gjergj Luca,

2023-04-16 10:00:00, Aktualitet CNA

Gjergj Luca,

Biznesmeni i njohur, Gjergj Luca, është përballur me pyetjet pikante të të rinjve të Pojanit, të cilët kanë zhvilluar "podcast"-in e tyre të parë me të ftuar special Gjergj Lucën.

"Podcast"-i i të rinjve është mundësuar nga vetë Luca, pasi të rinjtë detyroheshin të shkonin në Korçë për ta zhvilluar atë.

Në këtë "podcast" Luca ka folur për vetën, punën dhe familjen si dhe u është përgjigjur pyetjeve të të rinjve duke u dhënë njëkohësisht edhe këshilla shumë të vyera.

Luca pohon se është një njeri, i cili gëzimin më të madh e gjen te puna dhe se kanë qenë hallet ato që e kanë frymëzuar për të ecur përpara dhe të arrijë aty ku është sot.

“Gjergj Luca është njeriu që gëzimin e vet e gjen te puna. Halli mua më ka bërë që të eci përpara, ëndrrat e mia kanë qenë për librin, për artin, të ndiqja hapat e prindërve të tij dhe unë përfundova në rrugë, aty ku dhe fillova të krijoja ëndrra të reja”, tha ai.

Luca është zotuar gjatë intervistës së tij se do të bëjë gjithçka që mundet që rinia të ecë përpara.

“Njeriu duhet të mendojë finalen, pyetja juaj është shumë delikate. Gjatë rrugëtimit tim unë kam zgjedhur togfjalëshin tim, i cili është, puna dhe e vërteta. Sa të kem fuqi do të mundohem që rinia të zërë vend dhe të ecë përpara”.

Pyetjes së të rinjve se kush është politikani i tij i preferuar dhe më i urryer, Luca i është përgjigjur duke pohuar simpatinë e tij për kryeministrin Rama, si artist dhe jo si politikan.

Ndër të tjera ai ka dhënë edhe një mesazh të fortë për të rinjtë.

“Mua nuk më pëlqen politika dhe ju jeni në një moshë që nuk duhet të flisni për politikë. Unë Edi Ramën nuk e shikoj si politikan, por e shikoj si artist. E shoh si një njeri që do të bëhet ky vend. Ashtu sikurse kam thënë dikur si i transformon qytetet. Është njësoj si ato tablot e veta me ngjyra që i hedh dhe do me gjithë forcë që të gjejë një rrugë që dhe ju ta gjeni të shtruar nesër. Por unë sa herë ka biseda politike dal nga vetja, filloj bërtas. Pjesa më e madhe e politikës janë njerëz që janë mbledhur për interesa personale dhe jo për interesat e të rinjve. Do të jepja një këshillë për ju të rinjtë: Rini larg nga politika. Si ka mundësi që rinia peshkohet nga politikanët? Rini larg, gjeni veten, bëhuni të zotë të vetës. Mësoni njëherë të drejtoni jetën tuaj. Fatkeqësia më e madhe e këtij vendi janë personat që kanë hyrë në politikë pa provuar veten".

I pyetur më tej se cila është pasuria e tij më e madhe, Luca iu përgjigj se janë pikërisht njerëzit më të cilët punon që ia mbushin zemrën plot.

“Pasuria ime më e madhe janë njerëzit që unë kam pranë, njerëzit që unë punoj”, u shpreh ai.

"Podcast"-in e plotë të Gjergj Lucës mund ta ndiqni edhe në CNA TV.