“Burgu i vërtetë që ka njeriu është frika”/ Si reklamohet drejtoresha e korruptuar e Veliajt në media

2024-04-25 11:12:00, Aktualitet CNA

“Burgu i vërtetë që ka njeriu është frika”/

Fotomontazh, Deborah Keçi

Deborah Keçi, e cila mbante postin e drejtores së Klubit Sportiv “Tirana”, është e përfshirë në dosjen “5D”, sepse SPAK-u, ka provuar se në cilësinë e titullarit të autoritetit kontraktor Klubi Sportiv “Tirana”, ka favorizuar në një procedurë prokurimi operatorin ekonomik “V.A.S Konstruksion” sh.p.k., e njëjtë me “5D Konstruksion” sh.p.k., duke i krijuar avantazhe dhe privilegje të padrejta, si dhe duke e shpallur fitues në mënyrë të parregullt.

Nga dosja hetimore u zbulua se vlerësimin e ofertave të pjesëmarrësve në tender e kanë bërë vetë punonjës të shoqërisë “5D Konstruksion” sh.p.k., duke dhënë “user”-at e anëtarëve të Komisionit të Vlerësimit të Ofertave.

Por skandali tejkalon limitet kur, persona të tillë, të akuzuar, të përfshirë në korrupsion, u jepet hapësirë televizive, reklamohen ashtu si në rastin e Deborah Keçit.

Pas shpërthimit të skandalit me dosjen 5, pas zbërthimit të skemës së vjedhjes me disa dhjetëra miliona euro, Deborah Keçin e shohim në një intervistë, në podcastin e moderatores Alketa Vejsiu.

Vejsiu thotë se intervista me Deborah Keçin është realizuar dy muaj, por pse publikohet pikërisht tani?

Si mund të frymëzojnë njerëzit që kanë asistuar në vjedhjet e dhjetëra milionë euro nga xhepat e shqiptarëve të varfër?

Pse gjithë ky publicitet për njerëz të akuzuar dhe nën hetim për korrupsionin ndoshta më të madh në Shqipëri, pas vjedhjes së shekullit atë të inceneratorëve?

Është e turpshme mënyra se si po tentohet të mbulohet dhe zhvendoset vëmendja nga shkeljet e ligjit që kanë bërë zyrtarë të Bashkisë Tiranë, si në rastin e drejtorëshës Deborah Keçi.

Por përpos kësaj në intervistën që është publikuar në rrjetet sociale nga moderatorja vihet re një tjetër detaj.

Deborah Keçi gjatë intervistës shprehet: “Burgu i vetëm i vërtetë që ka njeriu është frika”.

Të njëjtën frikë tregon dhe në përgjimet e zbardhura nga dosja hetimore, ku kërkon që procedurat të bëhen me kujdes pasi ka frikë se mos përfundon në burg.

Pasi përfundon procedurën në shkeljet të ligjit, Deborah Keçi thotë: Më dilni për zot tani.

Pikërisht në këto momente, duket se po i del për “zot” Alketa Vejsiu, duke i dhënë hapësirë dhe duke reklamuar në mënyrë frymëzuese drejtoreshën e Erion Veliajt, zinxhiri komandues i të cilit ka përfunduar pas hekurave ose vazhdojnë të hetohen nga SPAK./ CNA