SKANDAL/ Agim Ismaili firmosi tenderin për rikonstruksionin e godinës që vetë e kishte shpallur jofunksionale

28 Janar 2026, 18:39, Denoncim CNA

Zullumet e Agim Ismailit, kur ushtronte detyrën si drejtor i Burgjeve duket se nuk kanë fund. Një raport i KLSH-së ka nxjerrë në pah abuzimet dhe shkeljet e kryera nga Agim Ismaili.

Abuzimet me procedurat e tenderëve/ Si u kërkua shkarkimi i Agim Ismailit nga detyra
27 Janar, 18:28

CNA përmes disa shkrimeve ka treguar se si Agim Ismaili si drejtor i Burgjeve përmbyti IEVP-të me ilaçe të skaduara, si futi ushqime pa standarte duke vënë në rrezik jetën e të dënuarëve, abuzimet me procedurat tenderuese për produktet ushqimore dhe tani në fund skandali i radhës ka të bëjë me një tender me objekt "Rikonstruksion në magazinat Vaqarr".

Faktet/ Si abuzoi Agim Ismaili me cilësinë e ushqimit për të dënuarit
25 Janar, 10:32

Çfarë ndodh?

Operatori ekonomik fitues i këtij tenderi ishte "Doksani-G" shpk me vlerë prej 4,530,393 lekë me tvsh, me grafikë punimesh për 4 muaj. Nga auditimi i këtij tenderi, u konstatua se Godina e Paraburgimit që do të rikonstruktohej, është godinë jashtë funksionit.

Me Urdhër Transferimi të Drejtorit të Përgjithshëm të Burgjeve në këtë godinë nuk ka më të paraburgosur, sepse ishin zhvendosur në ambientet e IEVP "Jordan Misja”.

Nga verifikimi në objekt rezultoi se, në këtë godinë, vuante dënimin alternativ vetëm një person.

“Nga auditimi i procedurës së prokurimit me objekt "Rikonstruksion në magazinat Vaqarr" dhe në bazë të Kontratës së Prokurimit nr.2619/7 datë 10.06.2019 lidhur midis AK të DPB me operatorin ekonomik fitues "Doksani-G" shpk, me vlerë prej 4,530,393 lekë me tvsh, me grafikë punimesh për 4 muaj u konstatua se:

Sipas, Kapitulli V (Preventivi me vlerë prej 487,996 lekë pa tvsh) të DT dhe të Kontratës, janë përfshirë dhe kryer punime pjesërisht, të cilat konsistojnë në hidroizolimi, me emulsion bitumi dhe shtesa karton katrama, në tarracën e Godinës së paraburgimit IEVP-Vaqarr.

Grupi i audituesve, verifikoi në kontrollin fizik më datë 13.01.2021, se Godina e Paraburgimit, është godinë jashtë funksionit pasi me Urdhër Transferimi të Drejtorit të Përgjithshëm të Burgjeve nr.3497/1 datë 17.04.2019, në këtë godinë nuk ka më të paraburgosur, të cilët janë zhvendosur në ambientet e IEVP "Jordan Misja” që prej muajit prill 2019. Nga verifikimi në objekt rezultoi se, në këtë godinë, vuante dënimin alternativ vetëm 1 person”,thuhet në raport.

Kështu, Agim Ismaili, në shkelje të hapur, ka nënshkruar kontratën për rikonstruksionin e godinës për të cilën kishte firmosur urdhrin për daljen e saj jashtë funksionit.

Si rrjedhojë e këtij abuzimi në raport theksohet se vlera prej 487,996 lekë pa tvsh ose 585,595 lekë me tvsh, janë fonde të shpenzuara pa efektivitet.

“Kështu më datë 10.06.2019 DPB ka nënshkruar kontratën për "Kontratë Prokurimi (Punë)"me OE, ndonëse vetëm 2 muaj më parë, më datë 17.04.2019, ka dalë urdhri i Drejtorit të Përgjithshëm të Burgjeve për daljen e godinës jashtë funksionit dhe transferimin e të burgosurve në ambiente të tjera, si rrjedhojë vlera prej 487,996 lekë pa tvsh ose 585,595 lekë me tvsh për kryerjen e punimeve në tarracën e Godinës së paraburgimit IEVP-Vaqarr, përbën fonde buxhetore të shpenzuara, pa efektivitet, ekonomicitet dhe eficiencë”, thuhet në raport.

Të gjitha këto fakte të sipërpërmendura në raportin e Kontrollit të Lartë të Shtetit tregojnë abuzimet dhe shkeljet e rënda të Agim Ismailit gjatë kohës që ai drejtonte Drejtorinë e Përgjithshme të Burgjeve.

Njëjtë si futja e ilaçeve të skaduara apo mbyllja e syve për higjienën dhe cilësinë e produkteve ushqimore për të dënuarit, abuzimet me procedurat tenderuese për produktet ushqimore, kjo është një tjetër shkelje e pasqyruar në raportin e KLSH-së. /CNA