web counter
LEXO PA REKLAMA!

SHKARKO APP

App Store
Google Play

Në Vjenë dhe Itali/ Udhëtimet e Beqajt me Rrapajn dhe administratorin e kompanisë së koncesionit 100 milionë euro

18 Nëntor 2023, 22:16, Denoncim CNA

Në Vjenë dhe Itali/ Udhëtimet e Beqajt me Rrapajn dhe

GJKKO caktoi këtë të shtunë masë sigurie për ish-ministrin e Shëndetësisë, Ilir Beqaj, të cilin e la në “detyrim paraqitje” dhe i ndaloi daljen jashtë territorit të Shqipërisë.

Beqaj akuzohet se ka shpërdoruar detyrën me koncesionin e sterilizimit 100 milionë euro, i cili u fitua nga kompania “SaniService”, në të cilën aksioneri më i madh ishte biznesmeni Ilir Rrapaj me subjektin “Investital LLC".

Siç CNA ka raportuar edhe më parë, Beqaj dhe Rrapaj kishin njohje para se të bëhet koncesioni i sterilizimit dhe kjo është konfirmuar nga udhëtimet që ata kanë kryer së bashku.

Ata kanë udhëtuar bashkë në Itali para se të hapej procedura e koncesionit dhe pasi u hap dhe këto fluturime janë përmendur edhe në dosjen e Prokurorisë së Posaçme.

Rrapaj ka udhëtuar në të njejtin avion me ish-ministrin e Shëndetësisë dhe ish-zv.ministrin e Shëndetësisë, Klodian Rjepaj dy muaj para se të ngrihej komisioni për dhënien e koncesionit të sterilizimit.

Udhëtimet datojnë që nga qershori i 2014-ës dhe madje Rrapaj një muaj pas kthimit nga Italia regjistroi kompaninë “Investital LLC”, aksioneren më të madhe të kompanisë koncesionare dhe në 18 gusht 2014 u ngrit komisioni për koncesionin.

Beqaj nuk ka qenë i vetmi që shkonte në Itali me Rrapajn, por edhe zëvendësi i tij, ndërsa një udhëtim i ish-ministrin rezulton në Vjenë me administratorin i shoqërisë koncesionare në shtator të 2016-ës.

Nga të dhënat në dosjen e Prokurorisë së Posaçme dhe në faqen zyrtare të Ministrisë së Shëndetësisë dhe Mbrojtjes Sociale rezultojnë këto udhëtime:

- Shtetasit Ilir Rrapaj, Ilir Beqaj dhe Klodian Rjepaj kanë hyrë në Shqipëri në pikën e kalimit kufitar Rinas, nga Italia, më datë 15 qershor 2014 përkatësisht në orën 21:12, 21:14 dhe 21:10.

– Shtetasit Ilir Rrapaj dhe Klodian Rjepaj kanë dalje nga Shqipëria në pikën e kalimit kufitar Rinas, me linjë ajrore Romë, në datë 26 mars 2015, përkatësisht në orën 16:34 dhe 16:25 (kjo periudhë përkon me shpalljen e njoftimit të tenderit brenda afatit të dorëzimit të ofertave).

– Shtetasit Ilir Rrapaj, Umbro Staccini dhe Klodian Rjepaj kanë dalje nga Shqipëria në pikën e kalimit kufitar Rinas, Peruxhia më datë 13 prill 2016, përkatësisht në orën 13:14, 13:07 dhe 13:10.

– Shtetasit Ilir Rrapaj dhe Klodian Rjepaj kanë dalje nga Shqipëria në pikën e kalimit kufitar Rinas, me linjë ajrore në datë 24 nëntor 2016 përkatësisht në orën 11:33 dhe 11:34.

– Shtetasi Admir Daca, administrator i shoqërisë koncesionare “Sani Service” që prej datës 1 dhjetor 2015 që fitoi koncesionin objekt hetimi dhe shtetasi Ilir Beqaj me detyrë Ministër i Shëndetësisë në këtë kohë, kanë dalje nga Shqipëria në pikën e kalimit kufitar Rinas, me linjë ajrore Vjena më datë 25 shtator 2016, përkatësisht në orën 14:15 dhe 14:06./ CNA





Lajmet e fundit nga