Denoncon kandidati i opozitës/ PS angazhon drejtorët e shkollave në Memaliaj për të bërë fushatë

8 Maj 2023, 15:55, Denoncim CNA

Denoncon kandidati i opozitës/ PS angazhon drejtorët e shkollave

Kandidati i koalicionit “Bashkë Fitojmë” për Memaliajn, Albert Malaj

Kandidati i koalicionit “Bashkë Fitojmë” për Memaliajn, Albert Malaj ka denoncuar abuzimin në shkollat e fshatrave të kësaj bashkie, teksa po afrohen zgjedhjet e 14 majit.

Malaj thotë se kryebashkiaku i Memaliajt, Gjolek Guci dhe deputeti Laert Duraj kanë angazhuar në fushatë drejtorët e shkollave brenda orarit të punës.

Ai përmend konkretisht drejtorin e Shkollës së Bashkuar të fshatit Izvor, Asqeri Muçohimaj, i cili sipas tij braktisi detyrën dhe doli për të bërë fushatë për socialistët.

Denoncimi i plotë:

Skandal i paprecedentë është shënuar mesditën e sotme në Buz dhe fshatin Shalës Bashkia Memaliaj.

Gjoleka dhe Laerti të zënë në panik të madh, angazhojnë patronazhista me kollare drejtori në fushatë elektorale brenda orarit zyrtar të punës.

Si kandidat i koalicionit opozitar BASHKË FITOJMË, denoncoj me forcën më të madhe aktivitetin ilegal të drejtorit të shkollës së bashkuar të fshatit Izvor Asqeri Muçohimaj. Ky i fundit mesditën e sotme ka braktisur vendin e punës dhe është vënë tërësisht në shërbim të dyshes Guci-Duraj për të shpërndarë trakte dhe “dacibao” në fshatrat e zonës së Buzit dhe në Shalës.

Aktiviteti i Asqeri Muçohimajt është i verifikuar dhe i provuar me fakte nga ana e stafit tim elektoral dhe me këtë rast, kërkoj prej autoriteteve kompetente të ndërhyjnë me urgjencë të ndalin këtë veprim të parecedentë ku arsimi bëhet palë me fushatën elektorale në favor të dyshes Gjolek Guci e Laert Duraj.

Pyetet që ngrihen natyrshëm janë:

Çfarë kërkon Asqeri Muçohimaj në Buz?

Përse zotëria në fjalë që është dhe drejtor shkolle braktis vendin dhe detyrën që paguhet me taksat tona, shkon dhe bën fushatë për dyshen e sipërme ?

Ku e gjen ky guximin të lëjë në errësirë nxënësit dhe shpërdoruar detyrën duke shpërndarë traktet diskriminuese të prodhuara nga dyshja Guci-Duraj?

Këto janë shenja të panikut të qartë që ka zënë gafil Gjolekën dhe mentorin e tij sot deputet në parlament.

Paralajmërimi që kam është ky:

Mos luani me ndjenjën dhe vullnetin e njerëzve. Mos luani me fatkeqësinë e tyre. Mos bëni presione dhe favore të paligjshme në këmbim të votës.

Forca e ligjit do të rëndojë tek ju në mos sot, nesër kur drejtësia të çlirohet nga falangat e krimit.

Ndërsa për zotin Asqeri Muçohimajn, kam vetëm një këshillë: Mos e bëj pis profesionin e nderuar që ke. Sado i maskuar që të shkosh kudo dhe kurrodo, je i skeduar nga ana jonë dhe sërish do të të denoncojmë publikisht dhe ligjërisht.

Koha po afron! Bashkë fitojmë!/ CNA.al

Denoncon kandidati i opozitës/ PS angazhon drejtorët e shkollave