LEXO PA REKLAMA!

SHKARKO APP

85 milionë të vdekur brenda 45 minutash/ Ja si do të ishte një apokalips bërthamor

30 Mars 2023, 08:00, Blog Mauro Indelicato
85 milionë të vdekur brenda 45 minutash/ Ja si do të ishte
Foto ilustruese

Lajmi mbi vendosjen e mundshme të armëve bërthamore ruse në Bjellorusi ka rikthyer sërish në qendër të vëmendjes një përshkallëzim të mundshëm bërthamor të Luftës së Ukrainës. Dhe për këtë arsye janë krijuar edhe skenarët e mundshëm se çfarë mund të ndodhë në Kontinentin e Vjetër në rastin e një sulmi nga Moska me armë të shkatërrimit në masë.

Vlerësimet flasin për të paktën 90 milionë viktima brenda pak orësh. Siç u theksua në “La Nazione”, ekziston një studim nga programi i Shkencës dhe Sigurisë Globale të Universitetit Prinston (SGS), në të cilin u simulua në detaje ajo që mund të ndodhte në një luftë atomike. Skenarët e marrë në konsideratë, konfirmojnë tablonë katastrofike që u shfaq edhe në simulimet e mëparshme. Megjithatë, duhet të merret parasysh se në rastin e një sulmi atomik nga Rusia do të kishte pasoja të rënda politike për Moskën. Dhe deri më sot, kjo është pengesa e vërtetë kundër veprimeve të këtij lloji.

Studiuesit simuluan një sulm rus nga baza ruse e Kaliningradit në veri të Europës. Në enklavën baltike të Federatës Ruse, ku prej vitesh (dhe në një pozicion në perëndim të Bjellorusisë) Moska ka mbajtur bateri raketash të afta të përmbajnë armë bërthamore.

Në skenarin e marrë në shqyrtim nga SGS, sapo Kremlini t’i japë dritën jeshile lëshimit të armëve atomike, falë afërsisë së Kaliningradit me qendrën e Europës, shumë kryeqytete të Kontinentit të Vjetër do të bombardoheshin brenda pak çastesh.

Varshava, Berlini, Praga, por edhe më në jug disa nga qytetet italiane, mund të shënjestrohen nga 300 raketat e para bërthamore të lëshuara nga territori rus. Në atë pikë, vendet e NATO-s do t’i përgjigjeshin menjëherë sulmit. Sërish sipas simulimit të institutit, Aleanca Atlantike do të lëshonte të paktën 180 pajisje bërthamore drejt objektivave në Federatën Ruse.

Kjo fazë e parë e luftës, do të kushtonte të paktën 2.5 milionë të vdekur brenda tri orëve.

85 milionë të vdekur brenda 45 minutash/ Ja si do të ishte

Përgjigja e NATO-s do të shkaktonte një kundërpërgjigje ruse. Sipas studiuesve të Prinston, Moska do të përpiqet të shkatërrojë të gjitha objektivat kryesorë ushtarakë në Europë me armë atomike. Në kundërpërgjigje SHBA-ja do të lëshonte kështu 600 bomba atomike në drejtim të Rusisë. Në këtë fazë të përgjigjes dhe kundërpërgjigjes, numri i të vdekurve mund të rritet në 3.4 milionë vdekje në 45 minuta.

Por tragjedia do të merrte konturet më të rënda në fazën e fundit. Me asgjësimin reciprok të objektivave ushtarakë, do të goditeshin pa dyshim të gjitha qytetet kryesore dhe qendrat kryesore ekonomike, si në Europë po ashtu edhe në Federatën Ruse.

Uashingtoni dhe Moska do të lëshonin disa armë bërthamore në 45 minuta, duke shkaktuar 85 milionë të vdekur. Një tablo rrëqethëse, një realizim dramatik i të gjithë skenarëve potencialisht të dëmshëm të “dimrit bërthamor” për të gjithë njerëzimin, dhe jo vetëm për territoret e prekura drejtpërdrejt nga bombardimet.

Por edhe sepse për çdo bombë të hedhur duhen vlerësuar efektet e rrezatimit të përhapur nga era në zona të largëta. Më pas katastrofa do të përfshinte të gjithë planetin. Ky simulim konfirmon atë që tashmë është vlerësuar prej disa dekadash: pasi të ketë filluar një sulm bërthamor, ndalimi i përshkallëzimit do të ishte shumë i vështirë, dhe do të ndodhnin ngjarje katastrofike që mund të rrezikojnë vetë ekzistencën e njeriut në Tokë.

Një simulim i tillë rrezikon të gjenerojë frikë më të madhe në ditët e sotme, të karakterizuara nga konflikti në Ukrainë dhe nga “vijat e kuqe” të vlerësuara si shumë të holla nga Moska dhe Uashingtoni. Megjithatë, shumë analistë politikë dhe diplomatë besojnë se hipoteza e një përshkallëzimi është e largët.

Dhe po e tillë është edhe lëvizja e fundit e bombave ruse në territorin bjellorus. Ky i fundit është një provokim që duket se nuk i alarmon më shumë sesa më parë vendet europiane më afër këtij vendi. Për shembull, Polonia dhe Lituania kanë vite që jetojnë me praninë e bombave bërthamore në Kaliningrad.

I intervistuar në “La Nazione”, historiani ushtarak italian, Gastone Breccia, foli për një Rusi “të marrë fund politikisht” në rastin e një sulmi bërthamor. “Putini mund të nxitet të nisë një sulm të dëshpëruar bërthamor, vetëm nëse ushtria e tij do të ishte në prag të kapitullimit. Kjo mund të ndodhë nëse Ukraina kryen një ofensivë të suksesshme duke çarë linjat e frontit rus.

Në këtë rast, e vetmja mundësi e Kremlinit do të ishte arma e shkatërrimit në masë. Megjithatë, unë besoj se Perëndimi dhe NATO nuk do të kishin nevojë të përgjigjeshin në të njëjtën mënyrë. Do të mjaftonte një kundërsulm konvencional, sepse në atë moment Rusia do të kishte marrë fund në aspektin politik”- thotë Breccia.

Edhe sepse në rastin e një sulmi atomik Moska do të armiqësohej me Pekinin. Në planin e tij të paqes prej 12 pikash, Pekini foli për përdorimin e pajisjeve bërthamore si një skenar që duhet shmangur dhe dënuar në çdo rast. Pra është një vijë e pakapërcyeshme për Kinën, të cilën Rusia duhet ta marrë parasysh.

Thënë shkurt edhe nëse Putin do të zgjidhte opsionin bërthamor, nuk është e sigurt se do të arrijmë në skenarin e simuluar nga SGS. Në Ukrainë, përdorimi i të ashtuquajturave “armë bërthamore taktike” (pra armë atomike të afta të shkatërrojnë gjithçka në pika specifike të kufizuara) do të mjaftonte për ta bërë Kremlinin edhe më të izoluar. Pra politikisht përdorimi i armëve jotradicionale nuk është as i përshtatshëm për palët ndërluftuese në Ukrainë, që e shohin se trupat e tyre janë të paafta të fitojnë në fushën e betejës me mjetet aktuale./ Përshtatur nga CNA.al

Lajmet e fundit nga