LEXO PA REKLAMA!

SHKARKO APP

Cili është sekreti për të pasur një jetë të lumtur?

25 Mars 2023, 17:56, Blog CNA

Cili është sekreti për të pasur një jetë të

Lumturia është diçka shumë e vështirë për t’u përkufizuar. Për një gjeni si Albert Ajnshtajni ajo bazohet tek një jetë e qetë dhe modeste. Për sociologun  e famshëm Zigmunt Bauman, ajo ka të bëjë me të qenit të gjendje për t’i kapërcyer vështirësitë. Dhe sipas studimeve të psikologëve, lumturia është edhe emocioni i përkohshëm që ndiejmë kur jemi mirë, dhe qetësia që na vjen nga ndjenja e të qënit të plotësuar, e cila është më e qëndrueshme.

Po ciladoqoftë ajo, ka megjithatë një lajm të mirë:lumturia nuk është një dhuratë që shkon tek një pakicë fatlume, por është një gjendje shpirtërore që mund dhe duhet mësuar. Pra ju mund bëheni të lumtur vetëm me pak përpjekje, dhe këtë mund ta bëjë kushdo.

Gjenet e duhura

Një pjesë e lumturisë duket se vjen nga përbërja gjenetike. Disa tipare të personalitetit që favorizojnë prirjen për të qenë një natyrë më e gëzuar. “Por studimet tregojnë se ndikimi i ADN-së në “shkallën e lumturisë” arrin në maksimumi vetëm 40 për qind. Pjesa tjetër bëhet nga zgjedhjet personale dhe qasja jonë mendore”- thotë Kiara Ruini, profesoreshë e psikologjisë klinike në Universitetin e Bolonjës.

“Vendosja se çfarë gjëje t’i kushtojmë më shumë kohë dhe vëmendje ndikon shumë në gjendjen tonë mendore. Për më tepër, njeriu duhet të mësojë ta shohë gotën gjysmë plot, që është çelësi i vërtetë të lumturisë”- thekson ajo. Po ashtu është vërtetuar se optimizmi të bën të jetosh më gjatë.

Optimizmi mund të mësohet

Studimet vërtetojnë se vetëm 1 në 3 njerëz, nuk lejojnë të mposhten nga vështirësitë e jetës duke vazhduar të shohin anët e mira të jetës. Por të bëhesh vërtet optimist mund të mos jetë e parëndësishme, sepse hapi i parë është ta pranosh se e sheh botën negativisht dhe pesimistët e mëdhenj vështirë se kanë sukses në jetë. 

Psikologët rekomandojnë taktikën e “shkrimit ekspresiv”. Pra 15 minuta në ditë të shpenzohen duke shkruar në një bllok mbi emocionet dhe përvojat, për të zgjidhur më mirë konfliktet, përmirësuar gjendjen  shpirtërore dhe për t’u ndjerë më i kënaqur me jetën.

Shoqërohuni gjithmonë me njerëz të tjerë

Gjithsesi përveç zgjedhjes së njerëzve të duhur, është gjithashtu e nevojshme të jetosh në vendin e duhur. Një anketë e fondacioni amerikan “Knight” e kryer me 43,000 njerëz zbuloi se ndjenja e mirëqenies psikologjike është më e lartë brenda komuniteteve mikpritëse, të cilat favorizojnë kontaktet sociale spontan (prandaj ekzistojnë parqet, restorantet, klubet, oborret e përbashkëta). Në fakt, është vërtetuar se tek ata që shëtitin shpesh në parqe dhe pyje, zonat e trurit ku zakonisht lindin mendimet negative janë më pak aktive. Kjo do të thotë që ata janë njerëz më të lumtur.

Nuk duhet të jesh domosdoshmërisht i pasur

Nga ky këndvështrim është e vërtetë që paratë nuk kanë rëndësi. Sepse kushdo që fiton në lotari, nuk është më i lumtur se dikush që nuk ka fituar ndonjëherë. Nëse nuk mungojnë burimet për të përjetuar më shumë, gjendja shpirtërore nuk ndryshon shumë:blerja e një makine të re apo e një fustani të modës së fundit, mund të të japë një moment të vogël kënaqësie, por nuk ndryshon nivelin e përgjithshëm të lumturisë.

Nëse ka ndonjë gjë që na duhet të blejmë ajo është koha. Dy sondazhe me mbi 6.000 njerëz në SHBA, Kanada, Gjermani dhe Danimarkë tregojnë se shpenzimet për shërbime që kursejnë kohë (nga ushqimi që e porositni dhe ju vjen në shtëpinë tuaj, duke ju lënë më shumë kohë për punët), ju bën më të lumtur sesa të paguani për objekte materiale.

Në kërkim të lumturisë

“Asnjëherë nuk është vonë për të pyetur veten. Por që ta bëni këtë duhet të ngadalësoni pak ritmin e jetës, të gjeni kohë dhe hapësirë për veten. Pak njerëz e bëjnë këtë, megjithatë ai është hapi i parë i vërtetë drejt lumturisë”- thotë Andrea Fianko, president i Shoqatës Italiane të Psikologjisë Pozitive.

Sipas tij nuk funksionon asnjë recetë nëse individi nuk e ka kuptuar fillimisht se çfarë është ajo. Tek e fundit, një jetë e lumtur nuk është një lloj Nirvane në të cilën gjithçka shkon mirë. “Pengesat janë të dobishme, pasi na nxisin të vëmë në punë burimet tona më të mira. Të jesh i lumtur do të thotë të jesh i vetëdijshëm se duhet të kalosh nëpër disa faza negative.

Janë ato që nxitin ndërhyrjen pjesën tonë më dinamike dhe me shumë vullnet, që t’ia dalim në momentet e vështira për të jetuar në maksimum momentet e bukura”-thekson ai. Ndoshta Bauman kishte të drejtë kur thoshte:”Lumturia më e qëndrueshme, është ajo që vjen pas kapërcimit të momenteve të vështira, kur më në fund mund të thuash:Ia dola!”./ Përshtatur nga CNA.al

Lajmet e fundit nga