Rama, porosi kryebashkiakëve: Integrimi në BE nuk duhet të banalizohet, rrezikojmë të ardhmen e vendit

10 Korrik 2026, 14:01, Aktualitet CNA

Rama, porosi kryebashkiakëve: Integrimi në BE nuk duhet të

Kryeministri Edi Rama u kërkoi kryebashkiakëve të angazhohen për ta afruar procesin e integrimit europian me qytetarët, duke theksuar se anëtarësimi i Shqipërisë në Bashkimin Europian nuk është një objektiv abstrakt, por një proces që ndikon drejtpërdrejt në jetën dhe mirëqenien e çdo familjeje.

Në fjalën e tij, Rama tha se nuk duhet lejuar që procesi i anëtarësimit të banalizohet apo të perceptohet si një temë propagandistike, pasi sipas tij ai përfaqëson një moment historik për zhvillimin e vendit.

Kryeministri theksoi se standardet e Bashkimit Europian duhet të shërbejnë si udhërrëfyes për çdo institucion dhe se përfitimet e integrimit duhet të bëhen të dukshme për qytetarët.

Duke folur për vizionin e qeverisë, Rama u shpreh se faza e re, të cilën e cilësoi "Rilindja 2.0", nuk do të fokusohet vetëm tek investimet në infrastrukturë, por edhe te rritja e cilësisë së jetës, forcimi i komuniteteve dhe krijimi i më shumë mundësive për të rinjtë.

Rama paralajmëroi gjithashtu se, sipas tij, alternativat që premtojnë "zgjidhje magjike" mund të vënë në rrezik arritjet e deritanishme dhe të pengojnë rrugën e Shqipërisë drejt Bashkimit Europian.

Ai u bëri thirrje institucioneve dhe pushtetit vendor të bashkëpunojnë për të mbështetur procesin e integrimit dhe për të shmangur, sipas tij, çdo kthim pas në reformat e ndërmarra.

“Nuk mund të lejojmë që çështja e anëtarësimit të banalizohet dhe ta ndajnë si një çështje që nuk lidhet me jetën e tyre të përditshme. Sepse është e pavërtetë. Prandaj bërja e prekshme e përfitimeve të këtij procesi është detyrë e përbashkët e të gjithëve ne. Është proces historik për 1 mijë arsye, por është proces historik edhe për ekonominë e kujtdo. Falë anëtarësimit në BE, Shqipëria e pas 10 viteve do të jetë Europa e të rejave dhe të rinjve. Por nuk mund ta bëmë në rrezik këtë proces dhe nuk mund të lejojmë që një narrativë, sikur kjo është propagandë, të kanalizojë energji negative ndaj procesit. Europa është standardi që kërkohet. Rilindja 2.0 është të ndërtojmë cilësi, jo vetëm infrastrukturë, cilësi jete, bashkëjetese. Nuk është të ndërtojmë më tej qytetin, por të ndërtojmë më tej komunitetin. Nuk është hajde të ndërtojmë rrugë të tjera, por të ndërtojmë lidhje dhe të krijojmë ndërlidhje, mobilitet të brendshëm dhe jo thjesht parqe e sheshe, por marrëdhënie. Jo vetëm ekonomi, por mirëqenie.

Ajo që ne kemi detyrë kombëtare, është që të mos lejojmë që marrëzia e zgjidhjeve magjike të fitojë terren, se pastaj gjithçka kemi ndërtuar do të shkojë me kokë poshtë, jo për ne, por për të nesërmen. Jo BE, por kthim pas dramatik, para se të jetë vonë për ata që besojnë te këto lloj ilaçesh çudibërëse ne duhet të vrapojmë më shpejt”, tha Rama./ CNA