‘Abuzim me ushqimin te “Zyber Hallulli”’/ Reagon sërish Shërbimi Social: Po bëhet politikë me fëmijët

3 Tetor 2022, 17:31, Aktualitet CNA

‘Abuzim me ushqimin te “Zyber Hallulli”’/ Reagon

Drejtoresha e Shërbimit Social Shtetëror, Reme Lala dhe drejtoresha e Shtëpisë së Fëmijës “Zyber Hallulli” në Tiranë, Suela Lilollari kanë sqaruar për opinionin publik për pas denoncimit të KLSH për abuzim me ushqimin .

Lala dhe Lilollari thonë se nuk ka pasur asnjë cënim dhe asnjë ndryshim në menunë ushqimore të fëmijëve.

Duke theksuar se çmimi në kontratën dyvjeçare të lidhur mes Agjensisë së Blerjeve të Përqëndruara dhe Operatorin Ekonomik është fiks, drejtuesja e shërbimit social sqaroi se çmimet mbeten të pandryshuara.

“Përsa i përket kuotës ushqimore më duket të ritheksoj se ekziston një kontratë dy vjeçare e cila lidhet nga Agjensia e Blerjeve të Përqëndruara me Operatorin Ekonomik. Në këtë kontratë theksohet se për këtë afat dy vjeçar çmimi është i fiksuar, pra nuk ndryshon. Më duhet të them se në asnjë moment sasia dhe cilësia e ushqimit nuk është prekur”, u shpreh drejtoresha e Shërbimit Social Shtetëror, Reme Lala.

View this post on Instagram

A post shared by Shërbimi Social Shtetëror (@sherbimisocialshteteror)

Lidhur me menunë ushqimore, drejtoresha e shtëpisë së fëmijës “Zyber Hallulli” Tiranë, Suela Lilollari tha se një grup disiplinar e vendos këtë.

“Mjeku ka një rol shumë të rëndësishëm në gjithë këtë proces për vetë faktin se ai është aktori kryesor që harton menunë së bashku me ekipin multidisiplinar. Ekipi multidisiplinar është një grup specialistësh të cilët ngrihen një herë në vit. Pjestarët e ekipit multidisiplinar janë përgjegjësi i sektorit social, punonjësi social, psikologu, mjeku, edukatori dhe ekonomisti”, deklaroi Suela Lilollari.

Drejtuesit e institucioneve hodhën poshtë akuzat dhe garantuan se menuja ushqimore e fëmijëve është e pandryshuar, duke theksuar se po bëhet politikë me fëmijët pa kujdes prindëror./ B.A. – CNA.al