E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Ndryshime të forta në PD, largime nga Gaz Bardhi tek nënkryetarët

27 Gusht 2021, 15:55, Politikë CNA

Lulzim Basha pritet të mbledhë të hënën Këshillin Kombëtar të PD, ku dhe do të jepet verdikti i fundit për të vendosur në kryesi njerëzit e tij më të besuar dhe për të kapur gjithçka i duhet.

Mbledhja e Këshillit vjen pas humbjes fatale në 25 prill, ku Basha shpalli fillimisht fitoren, pastaj theksoi se kutitë që hapeshin ishin të socialistëve dhe në fund deklaroi masakrën zgjedhore. Qartazi dhe mbledhja e Këshillit Kombëtar do të ketë këtë frymë si Kuvendi i dy muajve më parë.

CNA.al ka mësuar nga burimet e saj se Gazment Bardhi është nga emrat e parë që mund të largohet.

Gjithashtu mësohet dhe disa emra që pritet të mund ta zëvendësojnë. Alfred Rushaj ish-drejtor i fushatës është një nga emrat kryesorë që mundet të rivalizojë për vendin e Sekretarit të Përgjithshëm, por opsioni tjetër për Rushajn është posti i nën/kryetarit.

Bardhi u përfshi në një skandal elektoral në Elbasan ku një qytetar u vra dhe rezultati i tij ishte katastrof elektorale. Ai kishte gati 30 mijë vota më pak se socialistët dhe së bashku më LSI nuk mundën dot të krijonin mazhorancën në qarkun e Elbasanit.

Ka dhe emra të tjerë që përfliten, por kryesori është Alfred Rushaj, vetëm në rast se ky i fundit nuk pranon kandidimin, Gazment Bardhi mund të ketë më të qetë pozicionin e tij për një mandat të dytë.

Sekretariati pritet të ketë ndryshime thelbësore pas largimit të Sait Dollapit nga organizimi. Shumë emra, shumë personazhe politike nga ata që kanë hyrë të rinj në Parlament të cilët pretendojnë të kapin poste në sekretariat. Nga Ervin Salianji tek Tomorr Alizoti.

CNA.al gjithashtu ka mësuar se do të largohen të dy nënkryetarët. Edmond Spaho dhe Edi Paloka.

Nga ana tjetër pritet që Lulzim Basha ta çojë në katër numrin e nënkryetarëve që do të ketë Partia Demokratike. Pra do të bëjë disa lëvizje për të kënaqur emra të ndryshëm në parti, pasi dy postet e nënkryetarëve mbahen nga nënkryetari i Kuvendit dhe kryetari i grupit parlamentar. Gjithashtu dy nga postët e nën/kryetarëve do jenë zonja, ku përflitën Jorida Tabaku apo Grida Duma.

Departamentet rikthehen si ofertë e Lulzim Bashës për të shpërndarë sa më shumë poste. Do ketë shumë emra që do rivalizojnë që nga Enkelejd Alibeaj, Kreshnik Çollaku, Ervin Salianji, Luçiano Boçi, Gazmend Koduzi, Bardh Spahia, Fitim Zekthi, Ina Zhupa, Orjola Pampuri e deri tek Flamur Noka apo Oerd Bylikbashi dhe Ivi Kaso. Shumë nga emrat do jenë edhe personazhet që kanë pasur vullnetin më të madh dhe që kanë mbeshtetur Lulzim Bashën në çdo aksion dhe dështim të tij politik.

Do ketë largime në të gjitha sekretariatet dhe kënaqësitë mund të plotësohen me departamente apo pozicione që mund të shpikë Lulzim Basha rrugës siç ishin këshilltarët e tij që shpalli ditën e nxjerrjes së listës të kandidatëve për deputetë.

Kryesia e re pritet të ketë ndryshime të mëdha. Fakti i ndryshimeve që do bëhen në sekretariat, departamente etj do sjellë që shumë nga emrat aktualë të kryesisë të largohen, si Fatbardh Kadilli, Eno Bozdo, Florjon Mima, Endri Hasa etj. Basha këtë herë do luajë me formatin e kryesisë të madhe dhe të vogël për të pasur më shumë kontroll në një rreth të ngushtë individësh që do jenë në sekretariate.

Gjithçka mbahet shumë kofidente për shkak të lëvizjeve që do të ketë, e gjitha do të mbyllet zyrtarisht ndoshta vetëm të hënën, pasi pritet që Lulzim Basha të bëjë konsultimet e fundit dhe me faktorë të tjerë politikë brenda Partisë Demokratike ,duke tentuar kapjen dhe kontrollin e plotë të partisë.

Kjo është dhe shenja e parë se një betejë e re po vjen brenda Partisë Demokratike dhe mesaduket Lulzim Basha po kërkon të sigurojë gjithçka për të mbajtur karrigen e tij./CNA.al