Ushtrimet fizike në mëngjes/ Ja si ndikojnë në peshën trupore

23 Shtator 2023, 15:22, Sociale CNA

Ushtrimet fizike në mëngjes/ Ja si ndikojnë në peshën

Si ndikon koha e aktivitetit fizik në menaxhimin e peshës tonë trupore? Një studim i ri, përfundimet e plota të të cilit do të bëhen publike në numrin e tetorit të revistës shkencore “Obesity”, pretendon se është më mirë të merreni me sport herët në mëngjes.

Koha më e mirë është midis 7 dhe 9-ës

Nuk është hera e parë që debatohet mbi këtë çështje. Ekipi i studiuesve që e kreu këtë analizë nga Universiteti Frenklin Pirs në SHBA, identifikoi periudhën kohore midis orës 7:00 dhe 9:00 të mëngjesit si kohën më të përshtatshme që garanton një lidhje më të fortë midis praktikës sportive dhe një indeksi më të ulët të Masës Trupore (BMI), një nga parametrat që përdoret për të kuptuar nëse një person ka një peshë normale, është mbipeshë apo është obez.

Autorët thonë se studimi u krye duke përdorur përshpejtuesin (një instrument më kompleks se pedomometri, që vlerëson performancën fizike në hapësirë) për të klasifikuar kohën e lëvizjeve gjatë ditës, ndërsa vlerësimet e mëparshme ishin fokusuar tek frekuenca, intensiteti dhe kohëzgjatja e aktivitetit fizik.

Duke përdorur të dhëna nga ciklet 2003-2004 dhe 2005-2006 të Anketës Kombëtare të Ekzaminimit të Shëndetit dhe Ushqimit të Qendrave për Kontrollin dhe Parandalimin e Sëmundjeve (CDC) në SHBA, shkencëtarët studiuan 5285 pjesëmarrës dhe i ndanë në 3 grupe, bazuar në kohën e zgjedhur prej tyre për t’u marrë me aktivitet fizik: mëngjes, mesditë dhe mbrëmje.

Ata që zgjohen herët kanë një peshë trupor me afër normës

Pjesëmarrësit që përmbushën udhëzimet për aktivitet fizik në grupin e mëngjesit (150 minuta në javë aktivitet fizik të moderuar deri të fuqishëm) kishin një indeks të masës trupore dhe një perimetër të belit më të vogël sesa ata në grupet e tjera. Po ashtu, ata kishin në përgjithësi një dietë më të shëndetshme dhe një konsum më të ulët të energjisë ditore.

Një shënim i rëndësishëm: ata që ushtroheshin fizikisht në mëngjes, qëndronin më shumë kohë ulur gjatë ditës sesa ata në grupet e tjera, e megjithatë ishin sërish më elegantë se njerëzit që bënin pjesë në grupet që ushtroheshin fizikisht në mesdite dhe mbrëmje. Karakteristikat e grupit që stërvitej herët në mengjes përfshinin: një moshë më të madhe se të tjerët përafërsisht rreth 10-13 vjet, gratë zinin për qind më të lartë, ishin të bardhë jo hispanikë, kishin përfunduar arsimin universitar dhe nuk pinin duhan apo alkool.

Kronotipi

Një nga kufizimet e këtij studimi ka të bëjë me faktin se njerëzit që ushtrohen fizikisht në mëngjes, mund të jenë të ndryshëm nga ata që ushtrohen në orare të tjera të ditës. Për shembull, një nga variablat e rëndësishëm është “kronotipi”. Zgjimi herët, pavarësisht punës apo angazhimeve personale, është karakteristikë e “laureshave”, njerëz që biologjikisht ndryshojnë nga homologët e tyre që ndryshe quhen “bufa nate”, pra që rrinë zgjuar deri natën vonë dhe flenë gjatë orëve të paradites.

Ndërsa të parët janë natyrshëm të predispozuar për të stërvitur në mëngjes, “bufat e natës” preferojnë që aktivitetin fizik ta ushtrojnë në orët e vona të pasdites ose në mbrëmje. Për aq sa është e mundur, gjëja më e mirë për të gjithë, do të ishte ndjekja e orës së tyre biologjike.

Megjithatë, ata që duan të ruajnë një peshë të shëndetshme ose të bien në peshë, mund të zgjedhin stërvitjen në mëngjes, ndoshta me stomakun bosh dhe për të paktën 30 minuta, pasi në këtë mënyrë trupi do të shfrytëzojë si burim energjie rezervat e yndyrës. Nga Silvia Turin “Corriere della Sera”/ Pershtatur nga CNA