Praktika e lashtë kineze ul tensionin e gjakut, njësoj si ilaçet

20 Shkurt 2026, 07:54, Shëndeti CNA

Praktika e lashtë kineze ul tensionin e gjakut, njësoj si

Një praktikë e lashtë kineze që kombinon lëvizjet e ngadalta, frymëmarrjen e thellë dhe përqendrimin mendor mund të ulë tensionin e gjakut në mënyrë të krahasueshme me ilaçet dhe ecjen e shpejtë, sipas një studimi të ri të publikuar në Journal of the American College of Cardiology.

Bëhet fjalë për Baduanjin, një formë tradicionale e Qigong, e praktikuar në Kinë prej më shumë se 800 vitesh. Praktika përbëhet nga tetë lëvizje të strukturuara që zgjasin rreth 10 deri në 15 minuta dhe nuk kërkojnë pajisje apo përgatitje të veçantë.

Studimi njëvjeçar

Në studim u përfshinë 216 persona mbi 40 vjeç me tension të lartë të gjakut. Pjesëmarrësit u ndanë në tre grupe: një grup praktikonte Baduanjin dy herë në ditë për 15 minuta, të paktën pesë ditë në javë; grupi i dytë ecte shpejt për 30 minuta në ditë; ndërsa grupi i tretë kryente aktivitete fizike sipas dëshirës, me synim të paktën 150 minuta ushtrime në javë.

Pas një viti monitorimi, studiuesit zbuluan se Baduanjin uli tensionin sistolik mesatar 24-orësh me rreth 3 pikë dhe tensionin e matur në klinikë me rreth 5 pikë. Rezultatet ishin të krahasueshme me ato të grupit që ecte dhe me efektet e disa barnave të linjës së parë për hipertension.

Drejtoresha e mjekësisë parandaluese në Qendrën Kombëtare për Sëmundjet Kardiovaskulare në Pekin, Jing Li, tha se për shkak të thjeshtësisë dhe sigurisë, Baduanjin mund të shërbejë si një ndërhyrje efektive dhe e përballueshme në stilin e jetesës për personat që kërkojnë të ulin tensionin e gjakut.

Edhe kardiologu i Universitetit Yale dhe redaktor i revistës, Harlan Krumholz, i cili nuk ishte i përfshirë në studim, theksoi se madhësia e efektit ishte e ngjashme me atë të parë në provat klinike të barnave, por e arritur pa ilaçe, kosto apo efekte anësore.

Studiuesit vlerësojnë se praktika, e ngjashme me lëvizjet e Tai Chi, mund të jetë një alternativë e thjeshtë dhe e arritshme për kontrollin afatgjatë të tensionit të gjakut, veçanërisht për personat që preferojnë metoda natyrale./ CNA