Kumbaro dhe ambasadorja franceze prezantojnë ecurinë e Liceut Francez në Korçë

11 Nëntor 2025, 13:04, Qyteti im CNA

Kumbaro dhe ambasadorja franceze prezantojnë ecurinë e Liceut Francez

Në Korçë është zhvilluar takimi përmbyllës i Komitetit Pilotues për projektin e Liceut Francez, një nismë e përbashkët mes qeverisë shqiptare dhe asaj franceze. Projekti synon ngritjen e një institucioni arsimor me standarde europiane, që do të ofrojë një diplomë të dyfishtë, shqiptare dhe franceze, për nxënësit që do të diplomohen në këtë lice.

Ambasadorja e Francës në Tiranë, Catherine Suard, u shpreh se Liceu Francez do të jetë një projekt i përbashkët franko-shqiptar, me kurrikula dhe staf pedagogjik të integruar, ndërsa nxënësit do të mund të vazhdojnë studimet në universitetet më të mira të Europës. Ajo falënderoi ministren Kumbaro dhe institucionet shqiptare për bashkëpunimin, duke theksuar se hapja e Liceut parashikohet të realizohet në shtator të vitit 2027.

“Sot jemi mbledhur për takimin përmbyllës të Komitetit Pilotues në lidhje me projektin e Liceut Francez. Ky do të jetë një projekt i përbashkët franko-shqiptar, kurrikulat do të jenë të përbashkëta, pasi është bërë një punë e madhe për ekuivalentimin e tyre nga ana e ekspertit francez. Stafi pedagogjik do të jetë gjithashtu i përbashkët, me profesorë francezë dhe një pjesë shqiptare, si dhe me një diplomë të dyfishtë. Nxënësit që do të diplomohen në këtë lice do të kenë si diplomën e maturës shqiptare, ashtu edhe ekuivalentin e maturës franceze, dhe në këtë mënyrë ata do të mund të vazhdojnë studimet në universitetet më të mira të Europës, ky është një lajm shumë i mirë. Falënderoj ministren Kumbaro dhe të gjithë partnerët lokalë. Ashtu siç e dini, kemi një vit që po punojmë së bashku me ekspertin francez, por edhe me institucionet e tjera publike për hapjen e Liceut Francez. Është bërë studimi i fizibilitetit, i cili është dorëzuar. Dua të falënderoj qeverinë shqiptare për angazhimin, ministren Kumbaro për udhëheqjen që ka marrë tani në këtë projekt, dhe jam e bindur se do të shkojë drejt finalizimit në shtator të vitit 2027”, tha ambasadorja.

Ministrja e Arsimit, Mirela Kumbaro, tha se me përfundimin e fazës së parë është hedhur një hap i rëndësishëm drejt krijimit të këtij institucioni me karakter kombëtar dhe ndërkombëtar. Sipas saj, kurrikula dhe programi arsimor janë përgatitur në masën 90%, ndërsa po punohet për fazën finale që do ta kthejë liceun në një kampus të plotë me shkollë, bibliotekë, konvikt dhe mensë. Një element thelbësor, shtoi ministrja, do të jetë njohja e të dyja diplomave nga ministritë përkatëse të Shqipërisë dhe Francës.

“Sot në Korçë ishte mbyllja e një etape që zhvillohet prej një viti. Ishte mbledhja e fundit e Komitetit të Pilotimit të fazës së parë të një projekti shumë të rëndësishëm për Korçën, por përtej saj edhe për arsimin shqiptar, një projekt me karakter kombëtar, që ka të bëjë me ngritjen, ndërtimin, organizimin dhe hapjen e Liceut Francez. Ky do të jetë një institucion arsimor me karakter kombëtar dhe ndërkombëtar, pasi synimi është që Liceu Francez të ofrojë dy diploma për nxënësit që do ta frekuentojnë: diplomën e maturës shtetërore shqiptare dhe maturën franceze. Është përgatitur në masën 90% kurrikula dhe programi arsimor, ndërkohë që po punohet për fazën finale të zbatimit të projektit, i cili do të jetë më shumë se një shkollë, në fakt, një kampus me të gjithë elementët e nevojshëm, shkollë, bibliotekë, konvikt, mensë dhe më e rëndësishmja, me një sistem të përbashkët administrimi dhe menaxhimi. Një aspekt thelbësor i projektit do të jetë njohja e të dyja diplomave nga të dyja ministritë, shqiptare dhe franceze”, deklaroi Kumbaro.

Liceu Francez pritet të jetë një prej projekteve më ambicioze në fushën e arsimit, që do t’u ofrojë nxënësve shqiptarë mundësi të reja për studime dhe formim në standarde europiane./CNA