Si mund ta mundin Berisha dhe Meta, Ramën/ Arjan Çani zbulon taktikën

31 Tetor 2022, 14:45, Politikë CNA

Si mund ta mundin Berisha dhe Meta, Ramën/ Arjan Çani zbulon

Moderatori Arjan Çani ka komentuar koalicionin opozitar Berisha-Meta, ku u shpreh se të dyja palët janë të plagosur në betejën e zgjedhjeve lokale.

Sipas Çanit, Berisha është i plagosur nga “non-grata dhe grupimi brenda partisë”, ndërsa Meta është i plagosur nga çështja e Dosjeve të Sigurimit.

Në argumentin e tij Çani shprehet se të dy politikanët duhet të luajnë rolin e të plagosurit, për ta shfrytëzuar kundër kryeministrit, i cili ka abuzuar me pushtetin dhe ka bullizuar kundërshtarët politikë.

“Ka dy opsione, i pari është që nëse këtë herë Rama do vendosë të bëjë zgjedhje të lira sepse është çështje vullneti, mendoj se Berisha dhe Meta kanë shumë shanse që të fitojnë këto zgjedhje lokale, sepse ka shumë faktorë. Unë mendoj se po të mos ketë blerje e patronazhistë, kemi mbi 4 deputetë që janë me vota të blera ashiqare në parlament, por nëse ka zgjedhje të lira Berisha e Meta mund të jenë fitues, edhe pse është e vështirë të përcaktosh fituesin e zgjedhjeve lokale. Nëse qytetet kryesore ndahen mes tyre, opozita ka një shans të mirë. Berisha dhe Meta janë përfaqësues të mentalitetit shqiptar, të dy përfaqësojnë një sjellje publike në shumicën e saj, shto kësaj dhe të pakënaqurit që ka prodhuar qeverisja, mjafton që ky që është në pushtet po qeveris vetëm me 30 mijë vota më shumë, pra koalicioni PD dhe LSI dikur morën shumë vota. Mjafton që Berisha dhe Meta të përdorin mjetet e duhura dhe do kenë shumë shanse, ky është opsioni më ëndërrimtar, sepse besoj Rama do fusë sërish duart për të ruajtur pushtetin.

Veprimtaria e Metës tregon që është i vendosur që koalicioni të funksionojë. Meta dhe Berisha po shkojnë të plagosur në këtë betejë, Berisha nga Amerika dhe pjesa e partisë së vetë, ndërsa Meta pret të plagoset nga dosjet, di të them që të dy janë të plagosur. Gojët e liga thonë që amerikanët i kanë thënë Metës të mos shkojë me Berishën ose do t'i ndodhë e njëjta gjë. U la të kuptohet se Metës mund t’i vijë nga dita në ditë një sinjal i tillë, mendoj a do jenë në gjendje që të dy të plagosur të shkojnë në këtë betejë dhe njerëzve t'u vijë keq për ta. Ata do duhet ta luajnë si duhet këtë pjesë dhe faktor.

Rama po të shohësh hapat e tij po abuzon pak më shumë seç duhet me pushtetin, bullizmi i tij është rritur tejmase, mjafton të shohësh si i trajton mediat dhe opozitën dhe kjo mund të bëjë që njerëzit të favorizojnë më të dobëtit. Rama mund dhe të ndryshojë rrugës pasi 14 maji është larg. Këta personazhe nuk është e lehtë t’i zëvendësosh, këto dy figura, edhe pse kanë marrë goditje, qëndrojnë në këmbë dhe kanë ambicie për zgjedhjet”, - u shpreh Çani në “Pikat mbi I”./CNA.al