LEXO PA REKLAMA!

SHKARKO APP

Plani për biznesin/ Belind Këlliçi: Zerohen taksa e tarifa, përfiton biznesi i vogël

30 Mars 2023, 10:47, Politikë CNA
Plani për biznesin/ Belind Këlliçi: Zerohen taksa e tarifa,
Foto ilustruese

Kandidati i opozitës për Bashkinë e Tiranës, Belind Këlliçi, vijoi turin e takimeve me qytetarët dhe bizneset në kryeqytet, për t'u shpjeguar planin e tij fiskal që parashikon reduktim dhe zerim të disa taksave dhe tarifave vendore.

Teksa u ndal në zonën e sheshit "Willson”, Këlliçi u tregoi bizneseve disa nga taksat që do të hiqen pas 14 majit, nga të cilat do të përfitojnë biznesi i vogël dhe i mesëm.

“Taksa e tarifa do t`i heqim. Të paktën ty të prek taksa e arsimit, do hiqet, do zerohet direkt. Hapësirën publike, pastrim-gjelbërimit, taksën e arsimit i ke aty, nuk keni pse e paguani. I ke të gjitha aty në plan. Të gjitha reduktohen dhe zerohen një pjesë e madhe dhe përfitoni si biznes i vogël” - tha Këlliçi.

Gjatë takimeve në këtë zonë, qytetarët kanë mirëpritur premtimin e bërë nga Belind Këlliçi për transport publik falas. Duket se qytetarët janë dakord, që paratë, të cilat sot i jepen inceneratorit që nuk ekziston në Sharrë, të shkojnë pikërisht për transportin publik falas.

“Ke marrë iniciativa tepër të bukura. Ajo e autobusit është tepër e bukur. I kam ndjekur të tëra me dëshirën më të madhe. Absolutisht bëhet! Vetëm atë inceneratorin që ka ai, që e paguan pa punuar. Inshallah të ndihmon i madhi Zot, dhe njerëzit inshallah ndërgjegjësohen se ka ardhur koha me reagu çdo qytetar”, - u shpreh një qytetare gjatë bashkëbisedimit me Belind Këlliçin.

Licencimi i shumë kompanive që ofrojnë shërbim TAXI nga Bashkia e Tiranës, ishte një tjetër shqetësim i ngritur nga përfaqësues të këtij sektori gjatë takimit me kandidatin e opozitës për drejtimin e bashkisë së kryeqytetit.

“Nuk na shqetësojnë më shumë informalet, sesa taksitë që po jepen kështu sikur janë karroca dore”, - tha një shofer taksie, i cili këtë profesion e ushtronte prej 15 vjetësh.

Për këtë shqetësim, Belind Këlliçi bëri një tjetër premtim, duke garantuar taksistët se do t`i japë fund dhënies së licencave klienteliste për kompanitë e taksive.

“Po licencat që jep ky, i jep sepse i ka klientelistë të gjitha këto. Nuk do ndodhë kjo që po ndodh deri tani, sepse ka mjaftueshëm taksi edhe nuk do hapen taksi që janë të lidhura me kryetarin. Sepse kam dëgjuar që janë dy-tri kompani që janë të lidhura, i ka të vetat ky. Jo një e ka Endri Fuga, jo një e ka Erion Veliaj” -u shpreh Këlliçi.

Duke shtrënguar duart me qytetarët, Belind Këlliçi mori jo vetëm mbështetjen e tyre për zgjedhjet e 14 majit, por dëgjoi njëkohësisht edhe problemet që shqetësojnë banorët e kësaj zone prej vitesh.

“Nuk mban më asnjë gjë. Është bërë gjithandej pisllëk, gjithandej tmerr. Trotuaret aty janë të parregulluara nga të dyja anët, u bënë 30 vjet. Është shumë problem kjo pjesa e trafikut. Unë e kam në Dajt, por jam i regjistruar këtu te Njësia Nr.7. Po trafiku është shumë keq. Një orë nuk diskutohet, më shumë duhet të ikësh jashtë qytetit sesa me ardh deri këtu” - u shpreh një tjetër qytetar në takim me Belind Këlliçin./CNA.al

Lajmet e fundit nga