Afera me inceneratorin e Tiranës/ Alimehmeti rendit shkeljet e Veliajt

18 Shtator 2023, 21:09, Politikë CNA

Afera me inceneratorin e Tiranës/ Alimehmeti rendit shkeljet e Veliajt

Këshilltari i opozitës në Bashkinë e Tiranës, Ilir Alimehmeti

Këshilltari i opozitës për kryeqytetin, Ilir Alimehmeti foli sërish për alokimin e 6 milionë eurove nga Bashkia e Tiranës për inceneratorin inezksitent në Sharrë.

Alimehmeti tha në një intervistë me Sonila Meçon se kryebashkiaku Erion Veliaj ka firmosur për të gjitha bashkitë e Qarkut, në shkelje të ligjit.

Ai deklaroi se një shkelje tjetër qëndron në faktin se nuk ka dokument të Këshillit Bashkiak që lejon nisjen e procesit të ndërtimit të inceneratorit, por një gjë të tillë e ka firmosur vetë Erion Veliaj.

"Hallka e parë kush është? Kryebashkiaku në detyrë është kryetar për Tiranën por që në fillim ka firmosur për të gjitha bashkitë e Qarkut Tiranë.

Pra, nëqoftëse përfaqësinë e ke për këta qytetarët këtu, ç’punë ke me qytetarët atje?

Ç’detyrim kanë qytetarët e Kavajës, Vorës, Rrogozhinë, Kamzës, çfarë detyrimi kanë pse duhet të varen nga ti?

Kjo është shkelja e parë e rëndë.

E dyta, kryetari i bashkisë është organ ekzekutiv, pra legjislativ është Këshilli Bashkiak, nuk ka një dokument të Këshillit Bashkiak që lejon fillimin e procesit të ndërtimit të inceneratorit, e ka bërë ky me firmë të vetën, nuk e ka kërkuar kurrë Këshilli Bashkiak, pra që këtu diskutohej legjitimiteti.

Ky trau që thotë ai që është vendosur është vendosur me një metodë që në fillim abuzive dhe jolegjitime. Dhe kjo duhet parë në këtë kontekst sepse mund të mos ketë asnjë llojë detyrimi asnjë nga bashkitë me u marrë nga 30 vjet me këta njerëz duke parë që procedura është false që në fillim.

Elementi i tretë është ky detyrim. Për një S3 12 milionë euro duhej qeveria nga buxheti t’ja paguante këtyre koncesionarëve.

Deri tani ka dhënë vetëm diku te 4.5 milionë euro dhe ia kërkon tani Bashkisë Tiranë, shpenzoni ju 6 milionë euro të tjera.

Nuk po i hyjë pjesës së financave po për 6 milionë euro çfarë shërbimesh do i shkurtohen Tiranës për hir të firmës së Erion Veliaj për të inceneruar disa plehra që nuk incenerohen sepse nuk ekziston inceneratori me një kosto të pajustifikueshme dhe abuzive", theksoi Alimehmeti./ CNA