Basha, pjesë e diktaturës?/ Demokratët e kapin “mat”

17 Korrik 2022, 13:54, Politikë CNA

Ish-kryetari i Partisë Demokratike, Lulzim Basha, ka përcjellë një mesazh, 45 vite pas ekzekutimit të poetëve Vilson Blloshmi dhe Genc Leka.

Në një postim në rrjetet sociale, Basha shkruan se jetët dhe veprat e Gencit dhe Vilsonit janë një thirrje ende e gjallë për të gjithë ne, sidomos kur shohim që intelektualët trysnohen.

“45 vjet më parë diktatura komuniste ekzekutoi Genc Lekën dhe Vilson Blloshmin, dy poetë, që me forcën e fjalës së tyre lëkundën shpirtrat e padorëzuar ndaj të keqes dhe frikësuan regjimin e egër, sepse ndrydhja e përditshme, vuajtjet dhe izolimi, nuk e përkulte krijimtarinë dhe lirinë e poetëve, që nuk i këndonin pushtetit por realitetit të hidhur të diktaturës.

Genci dhe Vilsoni paguan me jetët e tyre guximin për të sfiduar një diktaturë që mbahej në këmbë nga heshtja, frika dhe dhuna, e si të gjitha diktaturat fundin e gjejnë kur qytetarët, falë shembujve të njerëzve të lirë si dy poetët martirë, mposhtin frikën.

Ndaj dhe jetët dhe vepra e Gencit dhe Vilsonit janë një thirrje ende e gjallë për të gjithë ne, sidomos kur shohim që intelektualët trysnohen, gazetarët “riedukohen” dhe modelet e të shkuarës komuniste riciklohen, na takon të gjithë ne të qëndrojmë dhe të luftojmë për lirinë, për shpresën, për të ardhmen.

Mirënjohje përjetë Vilson Blloshmit dhe Genc Lekës! I pavdekshëm qoftë kujtimi i tyre!”-shkruan Basha.

Por, pas këtij postimi, demokratët kanë “shpërthyer” në komente kundër Lulzim Bashës.

“A e ke pasë luftuar komunizmin asokohe me pantollona të shkurtra, apo akoma nuk ke qenë në qarkullim?!! Po tubin e oksigjenit kur ke ndërmend të ja këputësh këtij regjimi të sotëm??!!!”-ironizon një ndjekës i Bashës.

Më tej, një tjetër shkruan “Or Lyl u zgjove. Mos u merakos ti do ngelesh në histori si kryetari që la demokratët rrugëve për 9 vjet. Ti do jesh shembull për prishjen e PD-së, ti do jesh Basha Hollandez”.

Po ashtu një qytetar shkruan: “Kurse ti ekzekutove Opoziten, pluralizmin duke i dorëzuar tek e njëjta diktaturë, pjesë e së cilës je edhe ti o Lul kimiku ...”

Gjithashtu një qytetar shkruan: “Babai i mikut tënd i ka dënuar Kristaq Rama”./CNA.al