Integrimi në BE/ LRE, apel qytetarëve: Sot duhet të gëzojmë dhe reflektojmë

16 Korrik 2022, 20:04, Politikë CNA

Integrimi në BE/ LRE, apel qytetarëve: Sot duhet të

Kreu i LRE-së, Arian Galdini

Partia Lëvizja e Re ka reaguar për procesin e integrimit, pas vendimit të Maqedonisë së Veriut për të miratuar propozimin francez.

Me anë të një deklarate, LRE thotë se sot është dita të gëzojmë për lajmin e hapjes së negociatave me BE, por edhe dita të reflektojmë.

Sipas tij, duhet të reflektojmë sepse me Qeverinë Rama, vonesa për hapjen e negociatave, do të kthehet në zvarritje, ndërsa zhvillohen negociatat kapitull pas kapitulli.

LRE beson se hapja e negociatave e rikthen Shqipërinë në korsinë qendrore të Integrimit Europian dhe ia zbeh tekat qeverisë Rama për t'u endur rrugëve dytësore të ""Ballkanit të Hapur".

Deklarata e LRE për hapjen e negociatave:

LRE falenderon shqiptarët për durimin me vonesën e tejskajshme me Hapjen e Negociatave me BE.

Shqiptarët meritojnë gjithë falenderimet dhe mirënjohjen sepse çdo vonesë me proçesin e Integrimit Europian ka ardhur prej jo-vullnetit të tyre.

Pengestarët e parë janë ata që e kanë qeverisur Shqipërinë. Sepse në çdo Raport përsa ka pasur Progres-Raporte apo Raporte nga Komisioni Europian, në çdo deklaratë apo rezolutë të BE apo të vendeve anëtare të BE, gjithmonë janë vendosur kushte të cilat kanë synuar luftë kundër korrupsionit, ndëshkim ligjor në nivelet e larta politike, qeverisëse e institucionale, luftë kundër krimit dhe shkëputje të lidhjeve mes krimit dhe politikës, reforma, drejtësi, standarte europiane dhe mirëqeverisje, përgjegjshmëri dhe llogaridhënie, e zgjedhje të lira, të barabarta e të ndershme.

Mosplotësimi i kushteve nga Qeveria shqiptare, ka sjellë për vite me radhë refuzimin e Hapjes së Negociatave, nga BE.

Pengstarët e dytë kanë qenë llogaritarët elektoralë në vende të ndryshme të BE. Parti dhe politikanë në disa vende të BE që udhëhiqeshin nga sondazhet ngurruese ndaj zgjerimit të BE, u bënë edhe shkaktarët e herëpashershëm të refuzimit për Shqipërinë dhe Maqedoninë e Veriut.

Së fundmi, pengestarët për së paku vitet e fundit, u bënë poliikanë e parti politike Nacionaliste në Bullgari të cilët shkaktuan edhe humbjen më dramatike të kohës për proçesin e integrimit në BE të Shqipërisë dhe Maqedonisë së Veriut.

Tashmë prej sot, me votimin e propozimit francez në Parlamentin e MV, pengesa bullgare ra.

Pengesa europiane u tejkalua.

Pengesa shqiptare u anashkalua.

Qeveria shqiptare është vetëm pengesa e anashkaluar.

Sot është dita të gëzojmë për lajmin e Hapjes së Negociatave me BE, por edhe dita të reflektojmë.

Duhet të reflektojmë sepse me Qeverinë Rama, vonesa për hapjen e negociatave, do të kthehet në zvarritje ndërsa zhvillohen negociatat kapitull pas kapitulli.

Koha që shqiptarët të gëzojnë për hapjen e negociatave por edhe të mendojnë për të zgjidhur problemin e anashkaluar me Qeverinë Rama si pengestare e Integrimit Europian.

LRE beson se hapja e negociatave e rikthen Shqipërinë në korsinë qendrore të Integrimit Europian dhe ia zbeh tekat qeverisë Rama për tu endur rrugëve dytësore të Ballkanit të Hapur.

Anëtarësimi dhe vetëm Anëtarësimi në BE janë prioriteti i prioriteteve dhe intetesi ynë madhor kombëtar./ B.A. - CNA.al