E fundit!

14:42 Politikë

Dyfishimi i mbështetjes financiare/ Rama: Përfitojnë 11 mijë fëmijë me aftësi të kufizuara

Kryeministri Edi Rama ka zhvilluar ditën e sotme një vizit...

Presidenti i munguar

3 Qershor 2022, 22:59, Opinione Ilir Levonja

Presidenca

Për sa u fol deri tani dhe mënyra se si ua ofroi Presidentin e ri Edi Rama shqiptarëve, më kujtoi atë dialogun e filmit "14 vjeç dhëndër" të Dhimitër Anagnostit.

Gruaja donte në shtëpi një nuse për punët e dorës pasi nuk po ia dilte dot e vetme, një nuse për ta punësuar. Kështu i bie. Dhe bashkë me Vangjelin (Ramën) po seleksionionin kandidaturat.

Gruaja thoshte Viton e Kozmait, kurse Vangjeli ngulte këmbë, Marigon e zotit Kore/ dhe e bukur dhe punëtore.

Si përfundim, si e dini edhe ju tashmë, ca prej Çajupit, ca prej filmit, fitoi kandidatura e Vangjelit, pra Marigoja. Pa iu dridhur syri fare, por brenda një gjendjeje tepër të lodhur, se kështu u paraqitet shqiptarëve Edi Rama, me demek po këputet për Shqipërinë, gjeti një gjeneral, i cili nuk dinte asgjë, por e pranoi menjëherë kandidaturën për postin e Presidentit.

Nga ana tjetër të mendosh tri raundet e djegura pa gajle, ku të gjithë u përfshinë aty me përjashtim të Edit.

Të kujtosh atë vrullin e grupeve shoqërore në ato nismat intelektuale me pretendimin se po i ofronin Kuvendit figurat e duhura, ku të gjithë ishin të përfshirë aty, vetëm Edi jo. Të gjithë donin të ishin presidenti i radhës. Dhe pse jo deri sa Kushtetuta ua lejon.

Deri intelektualë që nuk kishin teserën as majtas e as dhjathtas, por me peshë në jetën e vendit. Dhe në një qasje normale t'i ofrohesh vendit tënd është vepra më fisnike. Derisa këtë mbrëmje një ironi therëse u ka ngërthyer shtrembër një buzëqeshje të hidhët në pamjen e tyre.

Ngado që ta kthesh sot Edi Rama ka plotësuar kubaturën e peshës së madhe të pushtetit të tij, pikërisht atë që nuk u duhet shqiptarëve. Madje, shoh në shtyp plot të marrosur që nisin e kumtojnë mbi integritetin e këtij gjenerali ashtu siç edhe bënë pesë vite më parë me Ilir Metën. Shqiptarët kurrë nuk e kuptuan se nuk kanë nevojë për një burrë të mirë, por për një president të zotin.

Se ndofta pas një viti ky burrë i mirë, mund të jetë në të njëjtat pozita që është edhe Ilir Meta sot. Aktualisht një pjesë e madhe kanë bindjen absolute se Presidenti Meta është kryekriminel, krye i korruptuar dhe nuk ngopen së godituri atë. Por kurrë nuk goditën atë që ua ofroi Ilir Metën si President.

E poshtëruan Ilir Metën me kamera të fshehta, e përdhosën me 21 janarin e 2011-ës, por në 2013-ën e pranuan kur Edi Rama ua ofroi si President. Më pas mbështetën Edin në luftën e ashpër për ta hequr duke u bënë po palë të një beteje që i shërbeu vetëm Edi Ramës dhe aspak Shqipërisë.

Kësisoj mund të ndodhë edhe me këtë burrin e mirë, megjithëse në një seks të kundërt është totalisht pamja e Marigos së përrallës sa komike, por aq dhe tragjike nga bagazhi tradicional shqiptar. Sonte ju nuk keni një President, as Shqipëria, as shqiptarët.

Derisa nuk e votoni, nuk e keni. Sot ka Edi Rama një Marigo për punët e shtëpisë. Ju mbetët rishtas spektatorë.