Lajmet kryesore deri në orën 15:00

Erion Veliaj dhe Mero Baze vijojnë të mos e nxjerrin dokumentin me firmën e Ols Dados dhe refuzimin me firmën e kryebashkiakut në lidhje me pretendimet dhe akuzat se prokurori po heton Veliajn për “hakmarrje”, pasi nuk i ka miratuar shtesën mbi lejen e ndërtimit.

Prej 24 ditësh ende jemi në pritje që Veliaj dhe Mero Baze të publikojnë dokumentin me firmën e Ols Dados kur kërkon shtesën mbi lejen dhe refuzimin me firmën e kryebashkiakut, i cili pretendon se Ols Dado po “hakmerret” dhe është në konflikt interesi.

Kërkesa nuk ekziston, as refuzimi, ashtu siç nuk ekziston inceneratori i Tiranës.

Po sjellim për të 24-tën ditë qëndrimet e Erion Veliajt dhe Mero Bazes, në pritje të publikimit të kërkesës.

Pretendimi i Erion Veliajt

Në pikën 135, Veliaj thotë se prokurori Ols Dado ka marrë një leje ndërtimi në Bashkinë e Tiranës dhe pastaj ka kërkuar një shtesë mbi atë me leje dhe kjo i është refuzuar.

Ndërsa në pikën 136 të dokumentit pa vulë dhe pa firmë, Erioni e trajton këtë si një çështje “hakmarrjeje” nga ana e prokurorit Ols Dado, sepse, sipas tij, nuk i është dhënë leja e ndërtimit për shtesën pasi ka bërë një kërkesë.

Pretendimi i Mero Bazes

Mero Baze thotë se, sipas tij, hetimi ndaj Veliajt është i kërkuar me ngulm nga një prokuror, i cili muaj më parë ka pasur konflikt personal me të, lidhur me kërkesat e tij për një leje ndërtimi jashtë kritereve ligjore që kishte bashkia.

“Pra, është e qartë që kemi të bëjmë me një hetim të kërkuar me ngulm nga një prokuror, i cili muaj më parë ka pasur konflikt personal për të, lidhur me kërkesat e tij për një leje ndërtimi jashtë kritereve ligjore që kishte bashkia, e cila nuk i është realizuar”, thotë Mero Baze, i cili shërben si vegël e kryebashkiakut Erion Veliaj.

Pse nuk e vërteton këtë Mero Baze? Ku e ka dokumentin me firmën e Ols Dados dhe refuzimin me firmë të Erion Veliajt? Pse nuk e nxjerr?/CNA

Kryeministri Edi Rama tha sot se pjesa teknike e procesit të anëtarësimit në Bashkimin Europian është një kanal që shërben si një bekim për ndërtimin e institucioneve në Shqipëri.

Në fjalën e tij në Konferencën Ndërkombëtare për Qeverisje, Rama e cilësoi si një udhëtim të nevojshëm dhe një trashëgimi institucionale për brezat.

 “Nga njëra anë, kemi procesin e BE-së, që është përtej pjesës politike dhe nga ana tjetër, kemi pjesën teknike. Është një bekim sepse është i vetmi kanal ku mund të tejkalojmë njohuri se si krijohen institucionet dhe Shqipëria ka për të ndërtuar institucione përmes këtyre kanaleve. Në fund, është një kurbë mësimi. Teknologjia e re u tregon shteteve si ne mund të bëjmë hapa të pamundur për ne. Synojmë të jemi vendi i parë me IA në prokurimet publike. Procesi për ne është po aq i rëndësishëm, edhe më i rëndësishëm se rezultati përfundimtar. Udhëtimi është ai që kemi nevojë, nëse ne bëhemi një vend i cili vepron si një vend anëtar i BE-së, kjo do të ishte trashëgimia më e madhe që mund t'u japim fëmijëve tanë, për t'u rritur në një shtet ku institucionet funksionojnë si në Itali apo një vend tjetër mesdhetar.”,-tha Rama./CNA

Këtë të mërkurë po zhvillohet mbledhja e Kryesisë së Partisë Demokratike.

Në fjalën e tij para Kryesisë, kreu i demokratëve, Sali Berisha, u ndal te përpjekjet e deritanishme të opozitës për njohjen me situatën në vend të ndërkombëtarëve.

Sa i përket situatës pas zgjedhjeve, që e quajti diktaturë autoritare, Berisha tha se është faji i kryesisë që nuk është qartësuar e gjithë gjendja tek anëtarësia dhe mbështetësit e PD-së.

“PD, si forca më e madhe opozitare, u angazhua në një përpjekje serioze ndërkombëtare për paraqitjen e gjendjes së rëndë për denoncimin e diktaturës autokratike të Edi Ramës në të gjitha organizatat ndërkombëtare.

E cilësoj si një moment të një rëndësie kapitale.

E them këtu, për shkaqe më shumë njohjeje, nuk është gjerësisht e realizuar se Shqipëria po jeton një diktaturë autokratike.  

Kjo më shqetëson, por më tepër në anëtarësinë dhe mbështetësit tanë.  

Nuk vjen nga mosdashja e tyre.

Një prej faktorëve është puna e dobët e jona për të qartësuar mbështetësit dhe anëtarësinë për konceptet thelbësore autentike.  

Diktatura autoritare e shtyp pluralizmin dhe është mizore. Pushteti është përqëndruar në një dorë”,-tha Berisha./CNA

Ambasadori i BE-së në Tiranë, Silvio Gonzato, ka zhvilluar ditën e sotme një takim me kryetaren e KLP-së, Mirela Bogdani.

Në njoftimin e bërë nga delegacioni i BE-së, thuhet se në takim u diskutua puna për të ardhmen dhe momentet kyçe, përfshirë emërimin e kreut të ri të SPAK-ut.

Më tej thuhet se delegacioni i BE-së do të ndjekë nga afër procesin e përzgjedhjes dhe emërimit të kreut të ri të SPAK-ut.

“Një sistem drejtësie i besueshëm dhe i pavarur mbetet thelbësor për të forcuar besimin e qytetarëve dhe për të avancuar rrugën e Shqipërisë drejt Bashkimit Europian.

Ambasadori i BE-së, Gonzato, u takua me znj. Mirela Bogdani, kryetare e Këshillit të Lartë të Prokurorisë (KLP), për të diskutuar punën në të ardhmen dhe momentet kyçe që priten, përfshirë përzgjedhjen dhe emërimin e kreut të ri të SPAK-ut. Delegacioni i BE-së do të ndjekë nga afër këtë proces, duke vazhduar njëkohësisht të mbështesë të gjithë sistemin gjyqësor në forcimin e pavarësisë, llogaridhënies dhe efikasitetit në të gjitha nivelet.

KLP ka një rol thelbësor në garantimin e procedurave transparente dhe të bazuara në meritë për ngritjet në detyrë, vlerësimet dhe standardet profesionale brenda sistemit të prokurorisë. Ne do të vazhdojmë të asistojmë KLP-në me ekspertizën tonë më të mirë për të ndihmuar Shqipërinë të përmbushë standardet e BE-së”, thuhet në njoftim./CNA

Kombëtarja do të zhvillojë një ndeshje miqësore në muajin tetor kundër Jordanisë. Federata e Futbollit ka arritur marrëveshjen me homologët jordanezë që takimi të luhet më 14 tetor, në stadiumin “Air Albania”, në orën 19:00.

Kjo do të jetë përballja e dytë në histori mes dy ekipeve përfaqësuese. Sfida e parë është zhvilluar më 10 tetor 2018 në “Elbasan Arena” dhe është mbyllur në barazim pa gola.

Data 14 tetor është e lirë sipas kalendarit të FIFA-s, pasi Shqipëria bën pjesë në një grup me pesë ekipe në kualifikueset e Botërorit 2026. Po në këtë muaj, kuqezinjtë do të zbresin në fushë edhe për ndeshjen kualifikuese ndaj Serbisë në Beograd.