web counter
LEXO PA REKLAMA!

SHKARKO APP

App Store
Google Play

Ukraina mohon pretendimet ruse për marrjen e Kostyantynivkës/ Sulm masiv me dronë ndaj Shën Petersburgut

4 Korrik 2026, 10:54, Kosova & Bota CNA

Ukraina mohon pretendimet ruse për marrjen e Kostyantynivkës/ Sulm

Shtabi i Përgjithshëm i Ushtrisë së Ukrainës ka mohuar pretendimet e Rusisë se forcat e saj kanë marrë nën kontroll qytetin Kostyantynivka në lindje të Ukrainës, një pozicion i fortifikuar i ushtrisë ukrainase në rrugën drejt qyteteve të fundit të mëdha të Donbasit që mbeten ende nën kontrollin e Kievit.

“Bëhet fjalë për pretendime të rreme”, deklaroi një zyrtar i Shtabit të Përgjithshëm ukrainas.

Nga ana tjetër, zëdhënësi i Kremlinit, Dmitry Peskov, deklaroi të premten se “Kostyantynivka është marrë plotësisht dhe qyteti tashmë ndodhet nën kontrollin e plotë të forcave tona”. Ai shtoi se presidenti rus Vladimir Putin ka zhvilluar bisedime me drejtues ushtarakë lidhur me situatën në këtë zonë.

Ndërkohë, autoritetet ruse njoftuan se gjatë natës Shën Petersburgu, qyteti i dytë më i madh në Rusi, si dhe rajoni i Leningradit, u goditën nga një sulm i madh ukrainas me dronë.

Guvernatori i Shën Petersburgut, Alexander Beglov, tha se qyteti me rreth 6 milionë banorë ishte objektiv i një sulmi në shkallë të gjerë me dronë. Ai nuk dha detaje mbi objektivat e goditur, ndërsa media lokale Bumaga raportoi për një zjarr në terminalin e naftës të qytetit.

Po ashtu, guvernatori i rajonit të Leningradit, Alexander Drozdenko, bëri të ditur se dronët goditën portin e Vysotskut, rreth 170 kilometra larg Shën Petersburgut, në Gjirin e Finlandës. Ky port përdoret për eksportin e naftës, drithërave, qymyrit dhe gazit natyror të lëngshëm (LNG).

Sipas Drozdenkos, mbrojtja ajrore ruse rrëzoi 72 dronë mbi rajonin e Leningradit. Deri më tani nuk janë raportuar të dhëna zyrtare për viktima apo përmasat e dëmeve materiale. /CNA





Lajmet e fundit nga