LEXO PA REKLAMA!

SHKARKO APP

Trump mund të përballet me akuza për mbajtjen e dokumenteve të klasifikuara

8 Qershor 2023, 08:48, Kosova & Bota CNA

Trump mund të përballet me akuza për mbajtjen e dokumenteve

Departamenti i Drejtësisë ka informuar ekipin ligjor të Donald Trump se ai është objektiv në një hetim federal për keqpërdorimin e mundshëm të dokumenteve të klasifikuara.

Burime të njohura me çështjen për "CNN", thonë se ky është një tregues se prokurorët mund të jenë drejt padisë ndaj ish-presidentit.

Vendimi i prokurorëve për të informuar Trump-in se ai është një objektiv kristalizon se hetimi i këshilltarit special Jack Smith është përqendruar në veprimet e Trump dhe jo vetëm në veprimet e njerëzve përreth tij.

Nëse ngrihen këto akuza, do të ishte aktakuza e dytë për Trump-in, i cili aktualisht po bën fushatë për t’u bërë president i SHBA-së edhe një herë.

Prokurorët kanë qenë duke e hetuar transferimin e dosjeve konfidenciale në pronën e Trump-it në Mar-a-Lago të Floridës që nga viti i kaluar.

Kjo pronë ishte kontrolluar në gusht të vitit të kaluar, kur ishin sekuestruar 11.000 dokumente, përfshirë rreth 100 të etiketuara si dokumente të klasifikuara. Disa prej tyre cilësoheshin "top" sekret.

Në një intervistë të dhënë më 7 qershor, Trump mohoi t'i ishte thënë se ai përballet me një aktakuzë për këto dokumente.

Kur u pyet nga "New York Times" nëse i ishte thënë se ndaj tij po zhvillohej një hetim federal, Trump tha se “duhet ta kuptoni” se ai nuk ishte në kontakt të drejtpërdrejtë me prokurorët.

Ky lajm vjen pasi prokurorët gjetën një regjistrim audio të Trump-it, në të cilin ai pranonte se ka mbajtur një dokument të klasifikuar edhe pas largimit nga Shtëpia e Bardhë.

Detajet e dokumenteve që mund të kenë qenë në posedim të Trump-it mbeten të paqarta. Dokumentet e klasifikuara zakonisht përmbajnë informacione që zyrtarët mendojnë se mund të dëmtojnë sigurinë kombëtare nëse bëhen publike.

Është kundër ligjit të SHBA-së që zyrtarët federalë, përfshirë presidentët, të transferojnë ose mbajnë dokumente të klasifikuara në një vend të paautorizuar.

Në fillim të kësaj jave, anëtarët e ekipit ligjor të Trumpit u takuan me hetuesit në Departamentin e Drejtësisë në Uashington.

Trump, i cili kryeson në sondazhet për të qenë kandidati i Partisë Republikane për president të SHBA-së në zgjedhjet e vitit 2024, ka mohuar vazhdimisht akuzat dhe e ka cilësuar hetimin e departamentit të drejtësisë si “të motivuar politikisht” dhe një “gjueti shtrigash”.

Çdo aktakuzë lidhur me dokumentet e klasifikuara do të vinte pasi Trump u bë ish-presidenti i parë që u akuzua për krim në SHBA, pasi ai u deklarua i pafajshëm për 34 akuza për falsifikimin e të dhënave biznesore për një pagesë për ta blerë heshtjen e një ylli të pornografisë./ CNA.al

Lajmet e fundit nga