“Ustallarët” e politikës së qytetit

2023-04-10 17:36:00, Opinione Hysni Gurra

Gazetari Hysni Gurra

Në Shqipëri demokracia nuk funksionon, kjo dihet. Ka funksionuar me hënë sipas rastit.

Por ajo që vërej si një shëmti, është lista e mbyllur për këshillat bashkiake.

Njësia më e vogël e demokracisë është lagja, qyteti. Ashtu është aplikuar sefte. Në Shqipëri qytetari nuk ka në dorë të zgjedhë përfaqësuesin e lagjes (zonës) në këshillin bashkiak. Një turp!!!

Partia nuk ia tregon emrin e personit që duhet të zgjedhë. Voton një person anonim, pa emër, pa mbiemër, pa fytyrë. Partia shfrytëzon fanatizmin e tij. Ose më saktë partia tallet me simpatizantin, e merr për idiot.

Si mundet t’i heqësh qytetarit të drejtën e zgjedhjes së anëtarit të lagjes që presupozohet të jetë zëri i tij në parlamentin e qytetit?!

Dhe ajo që më shtyu të shkruaj për këtë, është pështirosja që ndiej për persona që janë në listën e mbyllur:

Dakord, ligji elektoral është kështu, nuk ndryshohet dot sot. Ndodhi prej kthimit nga GJK për herësin dhe s’pato vullnet së paku për të hapur listat. Nuk është koha për të kritikuar ligjin. Por ama ka kohë mjaftueshëm që kandidatët për këshillin bashkiak të tregojnë qytetari, të tregojnë se pavarësisht ligjit zgjedhor ata janë për demokraci të drejtëpërdrejtë e përfaqësuese. Dhe si të tillë të dalin në qytet. Të takojnë qytetarët lagje më lagje, shtëpi më shtëpi. Të flasin me ta. T’u thonë që unë jam caktuar për të të përfaqësuar në këshillin bashkiak. Gabim është, jam caktuar pa u pyetur ju, por do punoj për ju, do ju dëgjoj ju, do çoj shqetësimet tuaja në bashki etj, etj.

Çfarë bëjnë këta? Këta rrinë! Këta sillen si politikanë të mëdhenj. Si “ustallarë” të politikës. Nuk shkojnë të takojnë qytetarët. Të shpjegojnë premtimet e kandidatit të tyre për kryebashkiak. Të bëjnë politikë, në fund fare. Se janë të sigurtë në listë.

Kjo ndodh me të gjjtha palët, por është shumë e theksuar te ata të mazhorancës. Ata nuk dalin fare, ata shfrytëzojnë fanatizmin idiot të njerëzve që shkojnë votojnë qorrazi partinë. Ndërkohë që janë ca njerëz të emëruar, nuk i janë nënshtruar konkurencës brendapartiake, por preferencës së liderit, preferencë që mund të vijë si pasojë e të qenit i aftë, por mund të vijë edhe si pasojë e të qenit servil.