Argumentat e truprojave mediatike të Edi Ramës!

2023-01-31 19:23:00, Opinione Hysni Gurra

Argumentat e truprojave mediatike të Edi Ramës!

Gazetari Hysni Gurra

Truprojat mediatike të Edi Ramës, një çetë e rrudhur që bredh nga mëngjesi në darkë nga ekrani në ekran është në hall të madh.

Halli quhet McGonigal! Nuk ka hall më të madh.

Ajo që i ngjau me ministrin më të sukesshëm Saimir Tahiri është pesë me hiç krahasuar me gjëmën që ka shpërthyer në Uashington.

E megjithatë truprojat mediatike të Edi Ramës edhe për këtë çështje ku akuza është publike dhe e bazuar mbi fakte kanë gjetur argumentat e tyre.

Argumenti i parë: Nuk ka mundësi që Rama t’ia ketë bërë këtë Lul Bashës, sepse atëherë në gusht dhe në shtator të 2017 flitej për bashkëqeverisje.

Ishte koha e “dashurisë së madhe”. Truprojat mediatikë me këtë argument vetëm sa kthjellojnë se çfarë është në gjendje të bëj Edi Rama. Kur ka bërë gjithë këtë investim në dollarë për të dëmtuar viktimën e tij Lul Basha, imagjino sa është investuar për të shpallur non-grata Berishën.

Dhe këtë e ka ditur para të gjithëve se e ka thënë edhe vetë në Kuvend: “A e kalon oqeanin me DASH”? Po pse Edi Rama donte të copëtonte Lul Bashën?

Shumë e thjeshtë. Edi Ramës i ka shijuar shumë opozita Jenisher +Kërpëratë. Ky është koncepti që ka për pluralizmin dhe alternimin e pushtetit kryeministri i Shqipërisë, kthimi i parlamentit në Estradë dhe sundimi me fasadë demokratike.

As më shumë as më pak (siç e kam theksuar në një artikulll tjetër) kopjimi i modelit të Aleksandër Vuçiç. Të dy e konsiderojnë si kryepunë shkatërrimin e opozitës.

Në këtë pikë “truprojat mediatike” bëhen krejt qesharak kur thonë: ja pra, nuk e ka përmendur fare Sali Bershën.

Argumenti i dytë, nga më interesantët është fakti se: “Edi Rama e ka patur detyrim të çojë informacione në FBI për të investiguar lobistin e opozitës”.

Kjo është të vësh duart në kokë!

Nëse Edi Rama, ky partizan i luftës ndaj lidhjeve ruse do të kishte informacion për opozitën shqiptare ai fare mirë mund të hapte jo një, por 100 çështje këtu. A ju kujtohet se ka kaluar një javë tashmë se si i mobilizoi me kuç e me maç të gjithë dhe brenda katër ditëve çoi në SPAK 5 akuza ndaj opozitës për 21 janarin?

Argumenti i tretë, i truprojava mediatike të Edi Ramës lidhur me këtë çështje është se nuk ka akuzë për Edi Ramën. Nuk ka akuzë për korrupsion, është vetëm mos deklarim dhe punë taksash. Akuza nuk thotë këtë gjë. Po t’i heqësh akuzës së Uashingtonit emrin e Edi Ramës ajo nuk qëndron dot jo në këmbë, por as shtrirë.

E gjithë akuza është e kthjellët se çfarë ka dashur dhe çfarë ka arritur të bëj Edi Rama përmes McGonigal.

Argumenti i katërt, i truprojave mediatike është edhe më qesharak. Ku janë faktet? Edhe po t’u nxjerrësh foto të Edi Ramës duke i dhënë dollarë McGonigal, do të thonë: “prit njëherë, të bëhet ekspertiza se dollarët mund të jenë fallco”. Media amerikane ka përshkruar me detaje si nisi hetimi. Një ditë të bukur nëntori të vitit 2021, dy agjentë të FBI trokasin në shtëpinë e ish të dashurës së McGonigal dhe i tregojnë një foto në të cilën kanë dale dy miq. Njëri është McGonigal, tjetri është Edi Rama. Kështu nisi hetimi ndaj mikut të madh të Edi Ramës.

Argumenti i pestë, nuk është i truprojave, por është i vetë Edi Ramës. “E kam patur vërtet mik, por në kuptimin anglisht dhe jo shqip. Këtë argument çeta e bodigardëve mediatikë nuk e përdor se mesa duket dhe mesa artikulojnë nuk dinë anglisht.

Por, të rrimë shtrembër dhe të flasim të drejtën. Argumentat e truprojave mediatike të Kryeministrit janë më të mira se argumentat që tha vetë Edi Rama në daljen e vetme publike. Ai për shembull tha se Agron Neza ka qenë në Lëvizjen e Dhjetorit, ka qenë me Azem Hajdarin, është kushëri me Besnik Mustafajn,... Mund të thoshte edhe se Agron Neza ka krijuar NATO-n, por thelbi është se akuza e prokurorëve amerikanë merret se çfarë është bërë më 2017 e këtej.

Për hir të debatit të shëndetshëm çeta e bodigardëve është e ftuar të sajoj ndonjë argument pak më interesant. E vështirë është, por e kanë treguar se kanë mendje pjellore për të justifikuar edhe gjërat më monstruoze që po bëhen në këtë vend.