Pagesat me kartë u rritën me 30% për tremujorin e parë

13 Maj 2026, 07:21, Ekonomi CNA

Pagesat me kartë shënuan një tjetër rritje të lartë në tremujorin e parë të vitit. Sipas statistikave të Bankës së Shqipërisë, në tre muaj numri i pagesave me kartë në terminale POS arriti në 7.58 milionë, në rritje me 30% krahasuar me tremujorin e parë të vitit të kaluar.

Për të katërtin tremujor radhazi, pagesat me kartë në terminale POS kaluan në numër tërheqjet e parasë cash nga bankomatet.

Kjo tregon që përdoruesit e infrastrukturës së sektorit financiar po e përdorin kartën më pak për veprime me paranë cash dhe po paguajnë më shumë nëpërmjet kanaleve elektronike. Megjithëse kjo tendencë ndikohet pjesërisht nga turistët e huaj, duket qartë se edhe shqiptarët po zhvendosen gjithnjë e më shumë drejt pagesave elektronike.

Në vlerë, pagesat me kartë në terminale POS për tremujorin e parë të vitit arritën shumën e 27.9 miliardë lekëve, në rritje me 22% krahasuar me të njëjtën periudhë të një viti më parë.

Sipas të dhënave nga Banka e Shqipërisë, numri i terminaleve POS për pranimin e pagesave me kartë në fund të tremujorit të parë arriti shifrën rekord prej 32 224 njësi, në rritje me 28% krahasuar me një vit më parë.

Përveç kërkesës më të lartë të tregut, shtimi i numrit të terminaleve POS është nxitur edhe nga programi promovues i ndërmarrë nga njëri prej operatorëve më të mëdhenj globale të pagesave me kartë, Mastercard. Programi i Mastercard, nëpërmjet bankave tregtare, ofroi instalimin e pajisjeve POS pa kosto dhe pa komisione transaksionesh për një periudhë fillestare, deri në vlera të caktuara limit.

Gjithashtu, një shtysë e mëtejshme mund të ketë ardhur nga detyrimi ligjor për pajisje me terminale POS, që u miratua në fund të vitit të kaluar.

Nga data 30 maj, do të hyjë në fuqi detyrimi i parashikuar në ligjin e ri “Për procedurat tatimore”, që kërkon pajisjen me terminale POS të bizneseve të akomodimit, transportit dhe të sektorit publik. Aplikimi i detyrimit ligjor për të pranuar pagesa elektronike alternative pritet t’i japë një shtysë të mëtejshme pagesave me kartë.

Bizneset e tjera do të kenë afat për t’u pajisur me terminal POS deri në fund të vitit 2026.

Ndërsa numri i kartave bankare aktive të lëshuara nga sektori bankar shqiptar arriti në 1.66 milionë, në rritje me 7.8% krahasuar me një vit më parë. Numri i kartave të debitit arriti në 1.47 milionë, në rritje vjetore me 8.7%. Ky produkt ngelet dominues dhe përbën më shumë se 88% të numrit të përgjithshëm të kartave bankare. Karta e debitit është një instrument bazik pagese, i lidhur me llogaritë rrjedhëse të bizneseve dhe individëve.

Ndërkohë, një rritjeje të lehtë i është kthyer edhe segmenti më i vogël, i kartave të kreditit. Në fund tremujorit të parë të vitit, sektori bankar raportonte pothuajse 120 mijë karta krediti aktive, me një rritje vjetore prej 2%. /Monitor