OPOZITA/ Cila është rruga?!

28 Shtator 2023, 11:43, Editorial Ibsen Elezi

Lulzim Basha, Gazment Bardhi dhe Sali Berisha

Cila është rruga?!

Jo rastësisht fokusi i mediave dhe opinionit publik ka kohë që është opozita.

Opozita është e vetmja rrugë nga vjen ndryshimi, shpresa për të nesërmen.

Sado që një pjesë "opozitarësh" të hutuar debatin rreth opozitës e shohin si sulm ndaj saj, në të vërtetë debati rreth saj në thelb pasqyron nevojën për ndryshimin e dëshiruar nga e gjithë shoqëria.

Ata që e shohin këtë debat parimor si keqdashësi, në fakt janë armiqtë e vërtetë të opozitës.

Shkalla e lartë e ashpërsisë së debatit vjen për shkak të funksionimit pa rregulla të opozitës, pra realisht jemi në një mjedis kaotik parapolitik.

Zgjidhja është opozita (kështu funksionon sistemi).

Pas 2013 forca më e madhe opozitare ka qenë PDSH.

Tentativat ndër vite të krijimit forcave të reja politike kanë qenë të pasuksesshme, së pari kanë qenë të paqëndrueshme për t'u bërë të besueshme dhe së dyti mesa duket nuk ka qenë momenti i duhur politik.

A është ky momenti i duhur politik dhe a është PDSH në një moment shkatërrimi?

Një pakicë qartësisht e evidentuar dhe vetëdeklaruar, e përfaqësuar nga Basha, sot Dejuro ka drejtimin e saj, duke u bërë një precedent i rrezikshëm në historinë e politikës shqipëtare. Një pakicë duke u kapur pas procedurash të deformuara që mund të bllokojë vullnetin e shumicës, pra defakto mund të realizojë një "neodiktaturë" brenda një sistemi "demokratik". Një absurditet ky që ka vënë në dilemë sistemin e drejtësisë duke e bllokuar situatën prëj pothuaj 2 vitesh.

Nga ana tjetër opozita defakto e 11 dhjetorit e përfaqësuar nga Berisha, që mori barrën e rithemelimit të PDSH dhe rrëzimit të Ramës, e cila ka ngecur te beteja me Bashën. Në fakt edhe kjo më është betejë llafesh.

Beteja e saj për rithemelim dhe rritje elektorale përfundoi në rrënim si brenda PD po ashtu edhe në elektorat (rezultati 14 majit tregoi që gjithë fronti opozitar pati një rënie me mbi 200 mijë vota).

Pea PDSH është në një moment krize, patjetër që kjo do e çojë në një braktisje edhe më të madhe elektorale, dalja në skenë e disa partive të reja të spektrit të "djathtë" ka si shpresë pikërisht këtë situatë.

Nëse PDSH do vazhdojë në rrugën e saj të degëzimit në 2 pjesë, atë të Bashës dhe Berishës, kuptohet që një pjesë e madhe e elektoratit të djathtë do e braktisë duke projektuar shpresën e tyre te këto "partitë e reja", deri diku edhe tek ato ekzistuese.

Ndarja në shumë pjesë e elektoratit të djathtë (pasi asnjë parti e re s'mund të bëhet shumicë) do të çonte në një situatë politike po kaq të rrëmujshme.

Rama nuk rrezikon fare të jetë forca më e madhe dhe do e kishte shumë të thjeshtë të tërhiqte në bashkëqeverisje disa prej tyre, për mos të thënë që do ziheshin kush të shkonte i pari. Të shkelësh mbi parime me justifikimin se kështu e ka politika është normë e paradallueshme edhe e këtyre "partive të reja".

Për mua, rruga më e vështirë dhe rezultative është që të ndalohet shkatërrimi i PDSH dhe ajo të ringrihet mbi baza morale të forta.

Që në shtator të 2018 kam ngritur alarmin për shpëtimin e PDSH nga rruga e shkatërrimit, duke shpallur domosdoshmërinë e një lëvizjeje 'antiestablishment për shpëtimin e PD dhe Shqiperisë', nëse atëherë shumëkush e kishte të vështrirë ta dallonte se PD ishte në rrugën e shkatërrimit, sot pas 5 vitesh po e shohin të shkatërruar.

Demokratët duhet ta kuptojnë se modeli i Bashës dhe Berishës janë përgjegjës për këtë, pavarësisht se ajo që shihni është një luftë fyerjesh e akuzash, mes tyre ata janë në një lidhje funksionale, ekzistenca e njërit lidhet ngusht me të tjetrit.

Për të ndaluar largimin e pjesës më të madhe të demokrateve nga PD dhe braktisjen e elektoratit të djathë në zgjedhjet e radhës, duhet domosdoshmerisht ndërtimi i nje modeli të tretë, oponent ndaj 2 modeleve të ngjashme Basha e Berisha.

Një model që në themel të tij ka bazë të fortë morale, pikëpamje të qarta politike dhe një strategji se si mund të rrëzohet sistemi mafioz-oligarki i ngritur nga RAMA.

- Anëtar te PDSH.

- Drejtues e ish-drejtues të niveleve lokale.

- Drejtues e ish-drejtues të strukturave qendrore.

- Deputet e ish-deputet që keni përfaqësuar elektoratin e djathtë në patlament.

Jemi në kufijtë ekstremë per te ndaluar shkatërrimin e PD.

PD është një parti historike e ndërtuar mbi sakrificat e familjeve të mëdha dhe nderuara të këtij vendi, individëve dhe personaliteteve që kanë sakrifikuar dhe kanë vënë një gur themeli të kësaj kalaje.

Nëse do heqim dorë nga mbrojtja e kontributeve tona dhe do pajtohemi me faktin që kjo kala është privatizuar Basha apo Berisha, apo do pranonim që kalaja jonë të zëvendësohet nga "kasollet e kashtës" që ofrojnë partitë e reja "me pseudo të djathtë" do i bëjmë një dëm të madh jo vetëm PD, por kombit.

Këto nuk janë lojëra fjalësh, janë momente historike ku përcaktohet e ardhmja.

Një model i tretë është zgjidhja.

Një model i tretë që nuk i përjashton, por fiton me garë ndaj 2 modeleve aktuale.

Jemi shumë dhe mund ta ndërtojmë.