URBANET E TIRANËS, KUSHTE SKANDALOZE

Ditët e fundit pronarët e shërbimit urban gjithëkombëtar kanë lajmëruar reduktimin nga 40-60% të flotës së autobuzëve, duke e thelluar kaosin e përditshëm. Arsyeja: Çmimi i lartë i karburantit për të cilin kërkojnë kompensim. Një kërkesë e drejtë kjo që, më së pari, detyron plotësimin prej tyre të kushteve skandaloze të udhëtimit me autobuzët urban tejet të amortizuar e që, ndonëse nuk plotësojnë kushtet kryesore të përcaktuara nga ligji, janë të licensuar

20 Prill 2026, 20:37, Denoncim Xhovan Shyti

Të udhëtosh me autobusët urban të Tiranës duhet të jesh i përgatitur për të përballuar një sërë sakrificash. Ca të rrjedhura nga amortizimi tej kufirit të lejuar teknik të autobusëve, të tjerat nga paedukata e keqsjellja e personelit shërbyes e mosrespektimi i orarit.

Përjashtuar linjat urbane “Tirana e re”, “Unaza”, “Porcelani”, “Kombinat-Konistudio” e ndonjë tjetër, gjithë të tjerat shërbejnë sipas parimit “orari jam unë, jo udhëtari që paguan shërbimin”.

Sepse përveç tarifës së biletës 40 lekë qytetarët paguajnë edhe për kompensimin mujore që Bashkia ua shpërndan shoqërive pronare të urbaneve.

Fondi kompensues mujor i Bashkisë rrjedh nga buxheti bashkiak që mbushet me taksat e qytetarëve banues në Tiranë. Pra qytetarët paguajnë dy herë për urbanet. Paguajnë çmimin 40 lekë të biletës gjatë udhëtimit, paguajnë dhe kompensimin bashkiak që shkon tek pronarët e linjave.

Hallall, por këto pagesa duhet të justifikohen nga ofrimi i një shërbimi korrekt, sipas standardeve e detyrimeve të rrjedhura nga kontrata e pronarëve me Bashkinë. E cila nuk përputhet kurrkund me realitetin që ofron përditshmëria e udhëtimit urban kryeqytetas. Sepse, e përsërisim theksueshëm: të udhëtosh me urbanet e Tiranës do të duhet të kesh nerva të durosh pritjen në stacion, ndalesat për kafe të shoferëve e fatorinove shërbyes, zhurmën e motorëve që nga vjetërsia rënkojnë besdisshëm.

Nga mosrespektimi i orareve të vendosura nga vetë kompanitë, autobusët mbushen teprueshëm me udhëtarët që duhet të përballojnë ajrin e rënduar nga mbajtja mbyllur e kondicionerëve, që edhe atje ku janë në punë nuk hapen nga shoferët.

Ose dhe atje ku hapen, nga konsumimi në maksimun në vend të ajrit të kondicionuar prodhojnë zhurrmë acaruese për psikikën e ngarkuar nga mali i halleve të përditëshme.

URBANET E TIRANËS, KUSHTE SKANDALOZE

Nga qënia jashtë kushteve teknike, autobusët e linjave urbane periferike nuk ta ofrojnë fare kondicionimin. I kanë shpallur vegla “tepër” kondicionerët. Xhamat e hapur zëvendësojnë këtë kusht të detyrueshëm për të marrë licencën nga institucionet zyrtare përgjegjëse.

Jo pak urbaneve “bubrece” të linjave periferike u pikon çatia në kohë shiu, por sakrificën më sublime në këtë katrahurë urbane duhet ta bëjnë udhëtarët e autobusëve “modern”, me xhama pa dritare, ku sundon ajri i shumërënduar.

Nga kushtet skandaloze të ajrimit në jo pak raste ka patur udhëtarë të cilët kanë humbur ndjenjat… Në fakt kushtet skandaloze që ofrojnë autobusët e linjave urbane të kryeqytetit nuk janë një zbulim i fundit.

Të tillat sundojnë prej vitesh, edhe pse ligjërisht mospërmbushja e tyre i detyron institucionet shtetërore të moslicensojnë ushtrimin e biznesit.

Gjë që nuk ka ndodhur në asnjë rast dhe është shkaku i vërtetë që shpjegon trashëgiminë dhjetra vjeçare të keqshërbimit urban, ku viktima pësuese janë udhëtarët që paguajnë për licensimin e pameritueshëm të flotave me autobusë urbane jashtë standarteve teknike që detyron ligji.

Por që paguajnë dhe për shtesat e përmuajshme kompensuese të kompanive urbane e pagat mujore te përfituara të zyrtarëve përgjegjës të bashkive, që qendrojnë e vështrojnë katrahurën urbane.

Thonë se realiteti i trishtë urban do të jetë prezentë për sa kohë të mos ndalet kanali i ndarjes së pareve nën dorë, midis pronareve dhe zyrtarëve. Thonë…/ CNA